Преподобный же падъ пред святителем на лицы своемъ и плакася горко, и моля святителя, да не повесть тайны сея никомуже, дондеже преподобный в жизни сей. И поведа о себе тайну наедине святителю Никите вся поряду – о отчествии своемъ и о воспитании и о прихождении своемъ из Рима в Великий Новъград, — яже исперва писана.
Святитель же Никита, сия слышавъ от преподобнаго, не мняше его яко человека, но яко аггела Божия и, воставъ от места своего, и отлагаетъ жезлъ пастырьский, и на многъ часъ ста и моляся и дивяся бывшему — якоже прославляетъ Богъ рабъ своих! По молитве же рече преподобный: «Аминь!» Святитель же Никита падъ пред преподобным на землю, прося благословения и молитвы от него, преподобный же падъ пред святителемъ на землю, моляся и прося благословения, себе же недостойна и грешна именуя; и оба лежаста на земли, плакастася, помочая землю слезами на многъ часъ, другъ у друга благословения просяще и молитвы.
Святитель же Никита рече ко преподобному: «Ты велика дара от Бога сподобленъ еси и древним чюдесемъ, уподобился еси Илии Фезвитянину[22] или апостоломъ, иже на Успение Пресвятыя Богородицы принесены быша на облацехъ. Тако и град нашъ Господь присети тобою, угодником своим, новопросвещенных людей благослови и присети». Преподобный же рече ко святителю: «Ты еси иерей Бога вышняго, ты помазанникъ Божий, тебе довлеетъ о насъ молитися».
Святитель же воставъ от земли, и не можаше утешитися от слезъ, воздвизаетъ от земли, давъ ему благословение и о Христе целование, и много беседовавъ съ преподобнымъ, и никакоже можаше насытитися сладкихъ и медоточных словесъ от преподобнаго. И хоте прославити чюдо, но не хотяше моления преподобнаго презрети. Святитель же Никита много моляше преподобнаго, да бы избралъ себе место потребно у него и пребывалъ с нимъ до исхода души своея. Преподобный же никакоже не восхоте сего сотворити, и отвещавъ, рече: «Господа ради, святче Божий, не нуди мене, довлеетъ бо ми на томъ месте терпети, идеже ми Богъ повеле». Святитель же Никита давъ благословение, и отпусти преподобнаго с миромъ на богоизбранное место.
Не по мнозе же времени поеха Никита епископъ ко преподобному Антонию, видети камень сий и место. Преподобный же стояше на камени, аки на столпе, и никакоже схожаше, моляся Богу день и нощь. И яко узре святителя грядуща к нему, сшедъ с камени и пойде в сретение ему, и приимъ благословение и молитву от святителя. И начат святитель дивитися в себе о чюдеси, и обхождаше место села того сюду и сюду. И рече ко преподобному святитель Никита: «Изволилъ Богъ и Пречистая Богородица и избра место сие, хощетъ, да воздвигнется твоимъ преподобьствомъ храмъ Пречистыя Богородицы, честнаго и славнаго ея Рожества, и будетъ обитель во спасение мнихомъ, понеже на предпраздньство[23] того праздника на се поставилъ тя Богъ на месте семъ». Преподобный же рече: «Воля Господня да буди». Святитель же хоте поставити ему хижицу близъ камени, преподобный же сего никакоже не восхоте, но всяку скорбь терпяше Бога ради.
Святитель же Никита хотя истее уведети о чюдеси, бояся искушения, начатъ розводя наедине селянъ техъ вопрошати о явлении преподобнаго. Они же единодушно реша ему: «Воистинну, святче, человекъ сий Божий по водамъ принесенъ бысть на камени» — и вся ему по ряду известно и достоверно изрекоша о преподобнемъ. Святитель же наипаче возгореся духовною любовию ко преподобному; и дастъ благословение преподобному и отъеха же ко святей Премудрости Божии святей Софеи во двор свой.
И святитель Никита посылаетъ по посадниковъ,[24] по Ивана и по Прокопия, по Ивановых детей посадничихъ, и рече имъ: «Чада моя, послушайте мене. Есть во отчестве вашем сельцо близъ града, рекомое Волховско; Богъ изволи и Пречистая Богородица воздвигнутися на месте том храму Пречистыя Богородицы, честнаго и славнаго ея Рожества, и устроитися обители странным симъ, преподобнымъ Антониемъ, и возшлется молитва къ Богу о спасении душъ вашихъ, и воспомяновение будетъ родителемъ вашимъ». Посадницы же с любовию послушаша святителя и отмериша под церковь и под монастырь земли на все страны по пятидесятъ саженъ. И повеле епископъ Никита возградити церквицу древяну малу, и освяти ею, и едину келейцу поставити мнихомъ на прибежище.
