И по скончании дний Мефусаломли и яви ся ему Господь въ видении нощнем, и глагола ему: «Слыши, Мефусаломе, азъ есми Богъ отца твоего Еноха. Видите волю, яко кончаша ся денье живота твоего, и приближи ся день почиваниа твоего. Взови Нира, сына сыну твоему Ламеху,[332] втораго, и облеци в ризы своя священыя, и поставиша у олътаря моего, и глаголеши ему все, елико ему будетъ во дни его. Зане приближают ся времена погибелныя всей земли и всего человека, и всего движущаго ся по земли, яко во дни его будетъ нестроение велико по земли. Зане взненавидит человекъ искренему своему, и людие на люди съгрезят ся, и языкъ на языкъ възмутитъ рать, наполнит ся вся земли крови и нестроениа зла.[333] К тому же оставят Творца своего, поклонят ся утвръженым на небеси, и хожение по земли, и волнам морским. И възвеличит ся противникъ, и порадует ся о делех ихъ. В ражделение мое, вся земля приемлет премены устроение свое, и весь плод, и вся трава пременяет времена своя, почают бо времени погибелнаго. И вси языци изменят ся на земли, в съжаление мое. И тогда азъ повелю бездне изринет ся на землю, и сокровища вод небесных изринет ся на землю.[334] (...) И погыбнет все составление земляное, и сотрясет ся земля вся, и лишит ся крепкаго своего и от дни того. Тогда аз преблюду Ноа,[335] сына сыну твоему Ламеху, пръвенца, и воставлю от семени его мира иного, и семя его пребудет в векы».
И въспрянувъ Мефусалом от сна своего, и оскорбе о сне зело; призва вся старца людскыа, и поведа все, елико глагола Господь к нему, и видение, к нему явльшаго ся от Господа. И оскоръбеша людие о видении его, отвеща к нему: «Господь владееть творити по воле своей. Ныне сотвори все, якоже глагола Господь к тобе».
Возва Мефусаломъ Нира, сына Ламефова втораго, и облече в ризы святительства пред лицемъ всих людей, и постави у главы олтарныа, и научи всему, елико сътвори в людех.
И глагола Мефусалом к людемъ: «Се Нир, се будетъ в лице ваше от днешняго дни княземъ вожь». И отвещаша людие къ Мефусалому: «Да будет нам глаголъ Господень, якоже глагола к тебе».
И егда глаголаше Мефусаломъ к людемъ, смущаше ся духъ его, и преклони колени, и простре руце свои на небо, моли Господа, и молящу ся ему изиде духъ его. И ускори Ниръ и вси лидие, и создаша гробъ Мефусалиму, и положиша ему ливанъ, и трость, и освящениа многа. И иде Нир и людие, въздвигоша тело Мефусалимле и положиша и во гробе, иже создаша ему. И положиша, и реша людие: «Благословенъ бысть Мефусалом в лице Господне и в лице всихъ людей». И снидоша ся оттуду, и глагола Нир к людемъ: «Ускорите днесь, приведете бравы, и унец, и горлицу, и голубь, да пожремъ в лице Господне, и порадует ся днесь, ти по том идете в домы своя». И послушаша людие Нира, ереа, ускориша и приведоша, и связаша я у главы олтарныя. И взя ножь Ниръ жреческий и пожръ в лице Господне. И ускориша людие, и сотвориша. И веселиша ся в лице Господне весь день, прославиша Господа Бога, Спаса Нирова и в лице людий.
И от дни того и бысть миръ и устроение по всей земли во дни Нировы — лет 202. И по томъ премениша ся людне от Господа, и начаша ревновати друг къ другу, и людие на люди възмущаху ся, и языкъ на языкъ въста бранью, и бысть мятежь великъ. И слыша Ниръ, ерей, и оскорбе зело, и рече во сердцы своемъ: «Приближило ся бяше время и глаголы, яже глагола Господь к Мефусалому, отцу отца моего».
И жена Нирова Софонима неплоды суши и не роди Нирови. И бысть Софонима во время старости, и в день смерти и приа во чреве своем. А Ниръ, ерей, не спа с нею от дни, имже, постави Господь в лице людей. Устыде ся Софонима и потаи ся вся дни, и никтоже не уведа от людей. И бысть въ день рожества, — и помяну жену свою Ниръ и възва ю к собе во храмину, да побеседуетъ с нею. И иде Софонима к мужу ея, се тай во чреве имущи, во время рожества. И видевъ ю Ниръ, и постыде ся ею зело, и рече к ней: «Что се сотворила еси, жено! И посрамила мя еси пред лицемъ всих людей. И ныне отиди от мене, иди, идеже еси зачала срамоту чрева твоего, да не осквръню руку моею о тебе и согрешу в лице Господне». И отвеща Софонима к мужу своему, глаголющи: «Се, господине мой, во время старости моеа, и не бысть во мне унотства — ни вемъ, како зачат ся безлобье чрева моего». Не верова ей Ниръ, и глагола ей Ниръ второе: «Отиди от мене, егда како уражю тя и согрешу в лице Господне».
И бысть, егда Ниръ к жене своей глаголаше, и паде Софонима у ногу Нирову и умре. И оскорбе Ниръ зело, и рече в сердци своемъ: «Егда от Господа моего и бысть ей? И ныне милостивъ и Веченъ Господь, зане не бысть рука моя на ней». И яви ся Нирови архаггелъ Гаврнлъ, и рече ему: «Не мни, яко жена твоя Софонима вины ради умре. Се иже от нея родивый ся младенецъ — плод праведенъ есть, и егоже восприемлю на рай, да не будеши дару Божью отець».
