Том 3 (XI-XII века, священная история) полностью

И тогда слышахом глас съ небесе глаголющь, архаггелъ призываетъ аггелы: “Приидете вси, глаголеть Господь, да снидета в Рай, понеже согрешилъ есть Адам”. И паки снидет Господь со всеми аггелы своими. И ста престолъ посреде Раю, и возва Господь гласом великим: “Адаме, Адаме, где еси?” — отвеща гласъ много. Адам же скрыся. И пояша нас аггелы, и свирепо биюще насъ, и изгнаша нас из Рая. Адам же плакашеся и молящеся глаголя: “Послабите намъ, егда когда умилосердится Господь о нас!” И не помилова насъ Господь. Архаггелъ Михаилъ[77] непрестанно моляшеся о насъ ко престолу. И тако изгнаша нас из Рая и отпустиша нас.[78]

Мы же седохом Едема оттужени. Адам же паде на лицы своем и плакашеся. И сотворихом дней 15, и изнеможе душа моя во мне гладом, и рех ко Адаму: “Господи, востани, да поищеве себе храмины, уже бо сердце мое одоле во мне гладом и душа моя омале”. Адам же воскликнувъ рече: “О Евга, находит на сердце мое разорити икону твою, но не имамъ с кем быти и боюся Бога. А сердце мое не удаляется от тебе”. И воставше и обидохом всю землю, и не обретохом ничтоже снедно, но токмо волчецъ[79] и траву селную. И паки приидохове во Едем и плакахомся[80] со вздыханьем. И рече Адамъ: “Господи, припосли ми воню, да тя поминаю”. Тогда посла к нему Господь фимиян, и ливанъ, и ладан.[81] И взятъ Адам и сотвори молбу ко Господу. И тогда умилосердився Господь, и архаггелъ Ивоилъ[82] отлучи 7-ю часть Рая и подасть нам. И преже наядохомся от плода тернова[83] за 17 дний и потом взяхом пшеницу и мед, и масла[84] и ядохом и насытихомся. И изгна вся скоты и зверие из Рая и предасть Адаму. Адам же отлучи я́ и сотвори дивие и питомое, и нарече всемъ имъ имена, и всем вещем питающим ся. И рече Господь: “Терние и волчецъ в деланиих твоих да прозябнет”.[85]

И поясть Адам волы и взора землю. И прииде Дьявол и ста пред волы, иже не дадяше Адаму землю орати. “Понеже, — рече Дьявол, — моя есть земля, а Божия небеса и Рай. Да аще хощеши мой быти, то землю тяжи. Аще ли хощеши Божий быти, то иди в Рай”. И рече Адам: “Божия суть небеса и земля, и вселенная”. Дьявол же не дадяше ему орати и глаголаше: “Запиши ми рукописание свое, да еси мой, и ты землю работай”. Адамъ же рече: “Чия есть земля, того и аз и чада моя”. Ведаше бо Адам, яко снити хощет Господь на землю и родитися от девы. Дьявол же обрадовашеся велми и рече: “Запишися мне”. И взят Адам плача[86] и записа рукописание, и рече: “Чия есть земля, того и аз и чада моя”. Дьявол же взят рукописание Адамова и держа у себя.[87]

Аз рехъ ко Адаму: “Господи, покаемся, нежели избавит ны Господь от Дьявола”. Адам же рече: “Постимся 40 дней”. Азъ рех: “Ты, господине мой, постися 40 дней, а я да пощуся 40 и 4 дни”. И рече ко мне: “Вниди ты в Тигръ[88] реку и положи камень на главе своей, а другий под ноги своя и стой до выя в воде, а не слышай никогоже, да не паки прельщена будеши”. И сотвори ми знамя сокровенно и рече ми: “Не изыди, дондеже аз прииду”. И воставъ Адам и поиде во Иерданъ[89] каятися, и ту снидошася вси зверие и птицы, и множество аггелъ и плакахуся Адама. Адам же погрузися весь во Иердани реце и пребысть 40 дней.

Дьявол же прииде къ Евзе, аки аггелъ светел, слезы роняша по земли, и глагола ми: “Евга, услыша Господь молитву твою и насъ, аггелъ своих, молящих за тебе, посла мене Богъ, да изведеши из реки Адама”. Аз же не веровах, и паки въ 3 день прииде и сотворився во Адамовъ образ и много блазни меня. Аз же не изыдох, дондеже вижу знамя, иже ми рекъ Адам. И егда же соверши Адам 40 дний, грядяше от Иердана и обрете Дьявол след приходящъ ко мне, и убояся велми, и егда како прелщена буду. И егда виде мя въ воде и возрадовася велми. И егда прииде ко мне, и аз не веровах, что есть господинъ мой. И показа ми знамя. Тогда веровах и изыдох из реки. Тогда свободи насъ Господь от Дьявола.

И седохом в Мадияме[90] и ту родихом Каина и Авиля. И всегда оба скоты пасяху.[91] Во единъ же день воставъ Адам от ложа своего и рече ко мне: “О жено, совершишася лета 14, отряжена есть кровь Авеля убиением Каиновым. Дай же ми осля, шед обрящу его”. Яко же слышах аз и распалися сердце мое. И всед Адам на осля изеде и обрете Авеля убьена, и не изрече ничтоже, якоже рече Адаму аггелъ. И принесе Авеля на место рекома Реон[92] и погребе его ту. И егда аз родих Сифа[93] и рекох ко Адаму: “Господине, не злосерди сердце свое, иже паки родих сына вместо Авеля и нарекоша имя ему Сиф”».