Бысть егда начаша человеци мнози бывати на земли и дщеря родишася имъ. Видевше же человеци дщеря их добры, пояша себе жены от всех, яже избраша.[103] И рече Господь Богъ: «Не имать пребывати духъ мой в человецех сих в векы, занеже плоть суть. Будуть же дние их 120 лет, сполини».[104] Видев же Господь Бог, яко умножишася злобы человеком на земли и рече Бог: «Да потреблю человека от земля, егоже сотворих; от человека до скота и от гад и до птиць небесных».
Ной[105] же обрете благодать пред Господомъ Богомъ. Ной праведенъ в роде своем, угоди Богу. Виде Бог земля осквернена от человекъ, и оскверни всяка плоть путь свой на земли. И рече Господь Бог к Ною: «Время всякого человека погубити на земли, исполнися неправда их пред мною. Створи себе ковчег на Аравитских горах»,[106] и показа ему древо четвероуголных[107] повеле делати ковчегъ в долготу 300 лактей, в ширину 50 лактей, в высоту 30 лактей,[108] — «И полатци сотвориши в нем разлечны». Тогда быша людие велици, волотове суть; тех 300 лактей, а наших 3000, тех 50, а наших пол 2000, тех 30 лакот, а наших 900. Егюптяне бо сажень лактем зоуть. «И оконца сотвори в ковчезе и посмолиши его внеуду и внутрьуду асфалтом,[109] двери же ковчегу сверху створиши, с стран же подница двоекраты и трикраты створиши». Ной же по глаголу анггелову начаша делати ковчег и сходяще з горы пища ради в три месяци в домъ свой.
Диавол же, искони ненавидяй рода человечя, прикоснуся к жене Ноеве и рече ей: «Испытай, где ходит муж твой». Она же рече: «Крепок муж мой, и не могу испытать его». И рече Диавол к ней: «Есть трава над рекою, вьется около древа. Ты же возми цвет травы тоя и укваси с мукою, и напои мужа своего, и исповесть ти все». Она же сотвори тако по Диаволю научению.
Ной же сшед з горы пища ради и рече: «Жено, дай ми пити, вжадахся от дела своего». Она же дасть ему чашу. Ной же испив рече: «Се есть хмель рванець, умному на веселье, на свадьбу, на кумовство и на братство, и на все доброе, а безумному на бой, на брань и на все злое дело». И испив Ной 3 чаши, веселяся с женою Ной. Она же начя дияволим научением ласкатися около мужа своего и рече: «Повеж ми, господине, где ходиши?» Он же рече ей: «Посла Господь анггела своего ко мне и рече ми: “Хощу потопити всю землю”, и повеле ми сотворити ковчег и внитти в него мне и тебе, и сыном нашим, и женам их».
И сказа жена Диаволу, где ходит Ной. Диавол же шед разби дело Ноево. И утре Ной вшед на гору, видев ковчег разбиен аки прах. И плакася Ной 40 дни, и явися ему анггелъ Господенъ, указа ему древо негнеючее, рекомое кедръ, и рече: «В сем древе созиждь ковчег». И созда Ной ковчег в 30 лет.
Бысть в 600-е лето живота Ноева, втораго месяца априля[110] 27 день. Прииде потоп на землю, откры Господь Бог 12 оконца морскиа, и развергошася хлябиа небесная,[111] и бысть дождь 40 дни и 40 нощи. Ной же удари в било, и вниде к Ною в ковчег сынове его Симъ, Хамъ и Афетъ и жены сынов его. Слышав глас той, вниде к Ною в ковчегъ двое двое от скот и от зверей чистых и от зверей нечистых, двое двое от птиць чистых и от птиць нечистых, и от гад внидоша в ковчег препитася с Ноемъ в ковчезе.
Диавол же не хотя добра роду человеческому, но хотя погубити его, прикоснуся к жене Ноеве и рече ей: «Не ходи в ковчег без моево слова». И тогда жена Ноева диаволим научением не поиде в ковчегъ. Уже вся собрашася к Ною в ковчег, жена же Ноева не иде в ковчег. Ной же начя звати в ковчег: «Поиди, акаяннице, в ковчег, поиди, прелестнице!» Она же стояше, тужаше о роде своем и ждаше слова Диаволя. И рече ей Ной: «Поиде, диаволе, в ковчег!» Она же поиде в ковчег, и Дияволъ с неюже вниде в ковчег.
Тогда акаянный Диаволъ, хотя погубити весь род человическый, превратися в мышь и начя грысти дно ковчегу. Ной же помолися Богу, и пришед в ковчег лютый зверь[112] и прыснув, из ноздри же его выскочиста котъ и кошка и удависта мышь ту. Повелением Божиим не збысться злохитрьство дияволе, и оттоле начя быти коты.
И повеле Господь воде вести ковчег на горы Аравитьскыа, идеже созданъ бысть. Ковчег же ношашеся на водах над горами высокими 15 лакотъ. И потопе всяка плоть. И плаваше ковчег 150 дней, и седе Ной в ковчезе 7 месяць 27 дни на горах Аравитьских. Вода же уходящи до 10-го месяца. В 11 месяць в 1 день изсяче вода от лица земли. И откры Ной покровъ ковчегу и оконець отверзе, и посла врана, отступила ли вода от лица земли. И шед, вран паде на плоть мертвых и не возвратися к Ною в ковчег.
