barbara mondo. En 1934 Hitler konfidos a proximulo : «Me laboras per
martelo, e me esforcas eskartar omno quo povas esar debila o vermoza...
Ni kreskigos ed edukos yunaro opoze a qua la mondo tremos, violentoza
yunaro, imperema, senpavora, kruela.»
Segun Angla historiisto, Thule havis anke adepti dil satanismo en lua
internajo. Omnakaze, Lucifer sempre min o plu vagadas en la regioni dil
okultismo. Per inkarnacar su en politikala movado di qua Hitler esabos la
mediumo, ica tenebroza idei gangrenigis e koruptis la Germana
nacionalismo ye apokalipsala maniero.
1 - nacionalistarismo* : Ico esas neologismo dal autoro di ca artiklo,
versimile kunfuzigante la vorti : nacionalismo e totalitarismo* por
expresar ke ica nacionalismo esis tote extremista sen posibla meza
konduto.
159
2 - pan-* : Ye mea konoco, ica prefixo veninta de la Greka linguo ne
existas en Ido. Ma ol existas en multa Europana lingui e signifikas :
tote, komplete.
3 - manikeismala : La manikeismo esas absoluta lukto inter du kontrea
principi. Ol esas anke maniero konsiderar ulo sennuance kom tote bona o
tote mala
(Ek Kuriero Internaciona n° 4/2009)
BALDUR, LA LUMO-DEO
Baldur esis la preferata filiulo di Wotan. Il esis bela quale la lumo dil jorno.
Omnaloke il difuzis lumo e joyo. Ilun amis omna Dei ; nur la maligna Loki
odiis lu.
Foye eventis ke Baldur sonjis pri sua proxima morto. Lore lua matro Frigga
esis tre trista. El iris a la animali, la planti ed a la kozi e pose omna enti
promisis a la Deino, ke li ne nocos lua filiulo Baldur. La Dei joyis pri co. Li
komencis ludo e lansis flechi e lanci adsur Baldur.
Ma nul armo povis vundar il. Ma la Deino pasabis apud arbusto sen
remarkar olu pro ke lu stacis ye la pedo di longa querko ed esis ankore
mikra e febla. Kande la ruzoza Loki saveskis ico, il kuris ad ica querko e
facis de l'arbusto pintizita flecho. Il donis ol a la blinda Deo Hödh e guidis
lua manuo. La flecho atingis Baldur meze dil kordio ed il falis mortinta sur
la sulo.
On portis di Baldur la kadavro an la rivo dil maro, pozis lu sur lua navo ed
acendis lu. Tale vehis la Deo lastafoye sur la blua maro. Ico esis
emociganta spektaklo ed omna Dei ploris, kande la brulanta navo sinkis
en la ondi.
(Ek Kuriero Internaciona n° 4/2009)
160
- LA MISTERII DIL HISTORIO -
LA MALEDIKO DA TUTANKHAMON
La laboranti tamen avertabis l'arkeologiisto Howard Carter : la tombo di
faraono Tutankhamon protektesas per malediko. «Se vu trovos oro, vu
anke trovos la morto», li repetas a lu.
Pos plura vana explori, la exkavi komencas ye la 1ma di novembro 1922,
en perimetro ube nulu ja entraprezabis ulo, nefore de la Valo dil Reji, t.e.
ica regiono di Egiptia shirmanta multa-nombra tombi di faraoni regninta
dum la periodo dil Nova Rejio.
Ye la 4ma di novembro, la membri di ca expediciono deskovras deko de
gradi qui duktas vers pordo markizita per la sigluro di Anubis. L'imajo di ca
deajo havanta shakalokapo, supozata akompanar la mortinti a la transa
mondo, revelas ke ita tombo esas olta di eminenta persono.
Kande il saveskas ica novajo, la pekuniizero dil aludita expediciono, lord
Carnavon, qua desespereskis abutar a rezulto, livas lua domeno
Highclere, en Unionita Rejio, por rajuntar la expedicion-membri.
LA LABORISTI OPOZAS SU A L'APERTO DIL TOMBO
Ma ante l'aperto di ca tombo, la kanario dil arkeologiisto Howard Carter,
quan la tota esquado konsideris kom fortunigilo, devoresas da kobrao*
(danjeroza serpento). Ica laste dicita insinuas su aden la kajo dil kanario
e manjas lu quik.
«Ico esas malediko», la Egiptiana laboranti opinionas, ilqui kredas ke ica
morto esas averto. La kobrao, serpento dil faraoni, segun la Egiptiana
kredaji, supozeble avertas li kontre l'aperto di la koncernata tombo.
Malgre la avizi di lia laboranti, Howard Carter e lord Carnavon, ferme
decidinta, apertas la pordo dil tombo, ye la 25ma di novembro, avan dek-
e-kino de membri di lia expediciono.
