En la mi-ombro dil unesma chambro, li trovas fantastika trezoro. Statui di
stranja animali, trono, mobli, chari, armi : omno kontenas oro e lapidi.
Duesma chambro, kovrita per blua e orea fayenco, kontenas la tri
inkastrita sarkofagi di Tutankhamon. En lasta chambro, Howard Carter e
lord Carnavon deskovras statueti e kofri plena de juveli.
Ita arkeologiala deskovruro konsideresas ankore nunadie kom la maxim
extraordinara di omna tempi : la tombo dil faraono, preske sendomaja,
161
konjekteble miraklatre sparesis dal spolianti. Plu kam 2000 objekti e statui
ora, alabastra ed ivora rekuperesis.
LA MORTI INTERSUCEDAS POS ICA DESKOVRO
Ma dum la yaro sequanta ica deskovro, lord Carnavon esas kaptita da
febro, konseque di pikuro da moskito. Lua sanesala stando plumaleskas,
ed on retroduktas lu ad Al-Qahira (Kairo), ube lu mortas ye la 5ma di aprilo
1923, ye la evo 57 yari. Ula homi raportas ke la elektrala lumi di Al-Qahira
omna extingesis ye la exakta instanto kande la dicita sinioro
transmondeskis. Ita morto e lua fantastika cirkonstanci debesus a la
malediko da Tutankhamon.
Duadek-e-sep plusa personi, membri dil expediciono mortis dum la monati
sequinta la deskovro. Georges Bénédite, Egiptologiisto oficanta che la
muzeo Le Louvre, mortas pos vizitir la tombo di ca faraono, same kam lua
Usana kolego, Arthur Mace, qua transpasas sen videbla kauzo. La
flegistino di lord Carnavon same kam la sekretariulo di Howard Carter
anke cesas vivar, tale fortigante la legendo pri la malediko dal faraono.
La jurnalisti di ta epoko konkursas pri imaginajo por explikar ica morti.
Certeni dicas ke oli produktesas da viruso restinta kaptita dum plu kam
3.000 yari. Altri iras til akuzar la vespertilii. Segun lia dicaji, epigrafo che
l'enireyo di ca tombo enuncis solena averto : «Ti qui penetras en ica sakra
tombo balde atingesos dal ali di la morto.» Ita epitafo en la realeso
nulatempe existis. Ol tote inventesis da la jurnalisti di ta tempo, qui, pro
indijo de informi, tegis ita arkeologiala deskovro per morbala e misterioza
velo.
CIENCALA EXPLIKO APARAS
L'arkeologiisto Howard Carter, qua esis la unesmo penetrir en ca tombo,
havis pacoza vivo-fino, e mortis kande il evis 65 yari, t.e. dek-e-sep yari
pos la deskovro dil tombo di la faraono.
La turbo de kuriozi qui vizitis la citita tombo kelka semani pos lua deskovro
ne subisis ulo regretinda.
Erste plura yari pose, lor la restaurado di la mumio di Ramses II, en 1985,
ciencala expliko povis furnisesar. Analizo revelis la prezenteso di
grandanombra fungi, per qui anke la tombo ipsa di Tutankhamon esis
kovrita, segun la noti da Howard Carter.
To quo dum longa tempo konsideresis kom malediko esus do nur la
simptomi di akuta pulmonito, produktita da ita fungi.
162
(Ek Kuriero Internaciona n°1/2010)
LA MALEDIKITA DOMO
Sube esas fantastika novelo dil Antiqua Epoko
Esis en Athina spacoza e komoda domo, ma male reputata e funesta.
Dum la noktala silenco, on audis bruiso de olda ferajo, e se on probis
askoltar, frakas-bruiso de kateni sonadis, sat fore unesme e pose tote
proxime. Balde aparis fantomo : lo esis oldulo, opresata per tenueso e
mizero, il havis longa barbo ed herisita hari. Lu havis ye la pedi entravili, e
ye la manui kateni quin lu sukusis. Pro ico la habitanti di ca domo subisis
hororinda e malauguroza nokti, quin li pasis per vigilar en teroro ; ita vigili
adportis la maladeso, e, per kreskanta pavoro sempre venis la morto.
Nome, mem dum la jorno , quankam la fantomo desaparabis, lua
memorajo restis avan lia ment-okuli, e la pavoro duris dum plu longa
tempo kam la kauzo di la pavoro. Itaque* la domo, abandonata e
kondamnata ye la solitareso, abandonesis komplete a la fantomo. On
tamen pozabis afisho en ol, esperante ke ulu, en la nesavo di tante granda
plago, volos komprar o lokacar ol. Uladie la filozofo Athenodoros venas ad
Athina, lektas la afisho, saveskas la preco, di qua la chipeso suspektigas
da lu ulo neklara ; il inquestas ed informesas pri omno, e tamen rezolvas
lokacar ol pro kuriozeso.
Lor la vesperesko, il instaligas laboro-lito en la unesma chambro di ca
domo, demandas lua tabeleti, lua stileto e lumo ; ilu forsendas lua servisti
aden la fundala chambri ; koncerne lu, il zelas pri skribar e tale laborigar
lua mento, lua okuli, lua manuo, pro timo ke lua ocianta imagino
reprezentigez da lu bruisanta fantomi e vana terori.
Lo esis unesme, quale omnube, la profunda silenco dil nokto ; pose batado
di fero, agitado de kateni. Il ipsa ne levas lua okuli, ne lasas lua stileto, ma
