Вниманию читателей предлагается Вторая редакция Жития Герасима Болдинского. Поскольку текст ее сохранился в единственном списке, дефектные чтения в необходимых случаях исправлены по тексту Первой редакции (по списку
Подготовка текста, перевод и комментарии Е. А. Рыжовой
Благослови, отче!
Слава ти, Господи, слава ти, иже нам сподобивый сие великое и неизреченное смотрение твоего таиньства в последнем в нашем роде, паче же и времена, и в ленивем естестве нашем, по пророку, реченному: «О, Господи, избави душу мою, яко нищь и убогъ есмь аз, въ скорбех пренеможе духъ мой»,[974] «предваристе стражбы очи мои, смутихся и не глаголах».[975] Помыслих дьни первыя, еже быша преже насъ в роде нашем и от различных странъ — ово убо на востоце, ово же под востоком, ино убо к северу, иная же к западу. Даже и на полунощную нашу страну луча светлости восия, и коснуся сердцу русскаго великаго князя Василиа[976] Сынъ Слова Божия — яко же втораго Павла[977] проповедатель поставит языком, тако же и сего, имиже весть судбами своими, ко граду Херсуни приводит, еже и глаголется и Корсунь,[978] тамо совершеное совершает сыну Свету. И яко вторый Павелъ Христа позна, тако же и сей благоверный и христолюбивый великий князь Василей Киевский всея Русии истиннаго же Христа Бога нашего позна, иже создавшаго всякаго человека от небытиа в бытие и всяческая словом сотворшая. Той убо бысть первый христианинъ в земле Русстей и всю землю Русьскую преосвященным Михаилом митрополитом[979] просвяти святым крещением, и вси вероваша во Единосущную Троицу и Неразделную, Отца и Сына и Святаго Духа.
Радуйся, граде божественый Киеве, в немже мала искра благочестие восия!
Радуйся и ты, блаженная Олга![980]
Радуйся и ты, божественый Василие!
Радуйся и ты, божественая пещера, в нейже поживе великий Феодосий и Антоний![981]
Радуйся и ты, божественый граде Владимере!
Радуйся и ты, граде Москва!
Радуйся и ты, божественый пределе Радонеж, иже в твоей стране в пустыне поживый святый Сергий авва,[982] постником наставникъ, иноком отець, вселенней учитель и чюдесем источник!
Радуйся и ты, божественая весь Обмора, в нейже поживе блаженный Павел![983]
Радуйся и ты, Звениграде, иже явися божественый Сава![984]
Радуйся и ты, божественая ограда великаго отца аввы Сергиа, в нейже поживе блаженный Никонъ![985]
Радуйся и ты, божественный граде Ростове, иже в тебе просиа божественый Авраамие![986]
Радуйся и ты, божественый граде Ярославле, в немже явися преподобьный Феодор с чады своими![987]
Радуйся и ты, божественая ограда, иже Колязина нарицается, в нейже поживе преподобный Макарий![988]
Радуйся и ты, божественый острове Соловецский, в немже пожыша преподобнии отцы Зосима и Саватей![989]
Радуйся, Григорий, иже божественую ограду на Пелешме составльша![990]
Радуйся и ты, божественый Христа ради юроде Михаилъ, иже на Клопске поживый![991]
Радуйся и ты, божественый чюдесъ источниче Варламе![992]
Радуйся и ты, божественый Сава, иже составивый обитель на реце Вишере![993]
Радуйся и ты, мужу желаний духовных Антоние, иже из Риму пришедый в Великий Новъ град![994]
Радуйся, Димитрие, иже на Прилуке составльшаго монастырь![995]
Радуйся и ты, блаженне Павфнотие, красота иноком, еже воздвигше монастырь пречестенъ во имя Святыя Богородица во граде Боровске![996]
Радуйся и ты, блаженне мучениче преподобне Никита,[997] иже Христа ради всю жизнь свою на столпе пребылъ еси!
Радуйся и ты, западная звезда Кириле,[998] на запади стояще и на востокъ просвещающе!
Радуйся и ты, блаженне князе Петре[999] преподобный!
Радуйтеся, блаженнии Авраамии и Ефреме, иже во граде Смоленске провосиавше![1000]
Радуйся и ты, божественый Александре, иже возгнездися акы птица Христа ради в пустыню, иже Свирской нарицается![1001]
Радуйся и ты, Макарие, иже в пустыни Жолтиковьской поживе![1002]
Радуйся и ты, Еуфимие, еже пречестенъ монастырь воздвигнувый, еже во граде Суздале![1003]
Радуйся и ты, Деонисие, иже в пустыни Глушыцской поживый![1004]
Радуйся и ты, блаженне Александре, иже поживый в пределех Каргаполскых![1005]
Радуйся и ты, Иосифе преподобне новоявленный, жытелю в пределех Волотцскых![1006]
Радуйся и ты, досточюдне и преподобне отче нашь Антоние, иже поживый в пустыни Сейстей![1007]
Радуйся всяко место и страна, и всяк град, и место, в немже святии сии пожывше!
