Пророкъ рече: «Да не хвалится премудрый премудростию своею».[1021] Паче же и аз не похвалюся о сем, яко премудростию списах, ведый своя недостоиньства, яко грубичанъ есмь и неразумен пред Богом и пред всеми людми. Не вем убо, как преполових препокоение Слово, обаче благодать Святаго Духа немощное человеческое естество исправляющи и наставляющи. Хвалю, благословлю, поклоняюся Господеви, пою и превозношу имя его святое, вразумивъшаго мя, и укрепившаго мя, и наставльшаго мя. Вы же, господие, и отцы, и братие, друзи и сродницы, Господа ради моление вам предлагаем, прошение представляя о моем невежстве. Аще будет в котором слове есми прегрешил или прописал, или хулу на святаго возложыл неразумием и малоумием своим, и вы Господа ради собою исправливайте малое недостаточьство, по апостолу, глаголющему: «Другъ другу тяготы носите».[1022] Тако и вы своим разумом мое недостаточьство исполняйте, а за мене, недостойнаго, молбы и моление ко Господу Богу сотворите и къ Пречистой его Богоматери и ко всем святым, паче же и ко отцу Антонию, еже не разсудих ума своего немощы и дерзнух на таковое великое дело, яже преписати житие преподобнаго отца нашего аввы Антониа. Но дасть ми Богъ оставление грехов вашими святыми молитвами. Аз, вседерзый и окаянный, дерзнух преписати о житии преподобнаго и о преставлении его лет 79, еже и ново слышах от чюдотворныя его ракы — яко река струями текущы, тако и сего преподобнаго отца чюдеса от целбоносныя его ракы непрестанно исцеление творят всем с верою приходящым.
Но, отче блаженне Антоние, аще пренебесных обителех пребываеши, не престай моляся о мне, грешнем рабе своем Иоанне, и преиду сверепое море житиа нашего, и от князей под духом врагъ душъ и телесъ наших непредкновенъ, твоими молитвами окрыляем, да царя царьствующых и Господа господьствующих[1023] престолу достигну, идеже шестокрылатии и многострашная серафими трепетом и ужасом предстоятъ, и божественую его крепкую и непобедимую десницу всескверная и окаянная душа моя придет. Да сподобит убо Богъ твоими, отче, святыми молитвами сих прежереченных избежати и достигнути Небеснаго Царствиа, иже твою, преподобне отче, память верою и любовию совершающих светло от чиста душа и сердца, и еже собрателей святому житию, и сказателей, и слышателей, и послушателей, и внимателей, и ревнителей о твоем житии.
А сие написах сего ради последи всех вышеименованных, яко не подобает похвалятися ни о чем же. Пророкъ рече: «Да не хвалится богатый богатьством своим, и да не хвалится премудрый премудростию своею, и да не хвалится силный силою своею, но о сем да хвалится хваляйся, еже разумети Господа».[1024] Сего ради и аз похвалении премудрости не похвалюся, а сие написах памяти деля и извещение, еже от кого преписася по фторое. Там убо предиреченных ни роду своего, ни имяни своего известихом,[1025] яко «не похвалится всяка плоть пред Богом».[1026] А иже аще хто вменет наше убогое имя и прочтет сие писание и не похулит, буди имъ милость от Бога. Иже аще кто прочетчи похулит, и отпустится им грех сей, яко поистину, не разсудивъ своя немощы, почах писати.
Вы же, господие и братие, молите за мя, грешнаго, и подасть ми Богъ и оставление грехов вашыми святыми молитвы и святаго его престола получити, егоже убо буди нам всем достигнути благодатию, и щедротами, и человеколюбием Господа Бога и Спаса нашего Исуса Христа, емуже купно слава подобает со Отцем и Сыном и с Пресвятым и Благым Духом, — всем имъ получити небесная царствиа со всеми благоугодившими Богу, — паче же о царе и великом князе Иване Васильевиче[1027] всея Русии самодръжце, и о победе на врагы, и о многолетнем здравии, и о утвержении скыфетра царствиа его, и о благоверных чадех его, и о благоверном царевиче Иване, о благоверном царевиче Феодоре.[1028] И да укрепитъ Господь Богъ их молитвами твоими царства ихъ непредкновенно и неподвижно, и чадом его скыфетры утвердит в Русьстем царствии. Но избавит Господь Богъ твоими молитвами землю нашу Русьскую от врагъ, и волкъ христоненавидець еретик, и от всех зверей зияющых, от востока, и запада, и от севера, и от юга. И да сохранит Господь Богъ, отче честный, твоими молитвами церковь свою и люди своя безо всякые враскы и скверны.[1029] Но, отче блаженне Антоние, не престай и не оскудевай моляся и посещая нас в напастех наших Христу, яко да твоими молитвами сохранены будем от врагъ душевных и телесных, яко да прославится имя твое святое в Русьстей земли и во окрестных местех, яко несть инаго Бога, иже разве того, иже прославившему своя угодникы, емуже подобает всяка слава, держава, честь и поклонение со безначалным его Отцем, с Пресвятым и Благым и Животворящим его Духом во вся бесконечныя векы до скончаниа веком! Аминь.
Благослови, отче!
