И глагола ми: “Егда ис плъти семо възвратишися хотениемь Отчьмь, тъгда въсприимеши одежю свою и тъгда ты будешь равьнъ ангеломъ, сущимъ въ семемо небеси”. И възведе мя на шестое небо. И престола ту уже не беаше, ни десныхъ ни шуихъ ангелъ, нъ вьси имеаху единъ възоръ и песнь ихъ равьна. И дасть ми ся да и азъ пояхъ съ ними, и ангелъ, иже съ мною быхове, яко слава ихъ беаше едина. И славляаху Отца вьсехъ и възлюбленаго Сына и Святаго Духа, вьси единеми усты пояху, нъ не тацемь яку имеяху на пятемь небеси, нъ инацемь гласом, и светъ многъ мьняхъ велий беаше. И егда бехъ на шестемь небеси, светъ, иже на пятемь небеси, тьму сущь. И въздрадовахъ ся зело и въспехъ дарующему таковая приемлющиимъ милость его. И помолихъ ся ангелу, наставляющему мя, да къ тому не възвращуся въ миръ сь плътьныи. Глаголю же вамъ, яко многа тьма есть сьде. Ангелъ же наставляяй мя глагола ми: “Чьто яко въздрадовася о свете семь, кольми паче въздрадуешися и възвеселишися, егда узьриши света праваго небесе, идеже седить небесьный Отець и единочадый его Сынъ, идеже опълъчения и престоли и веньци лежать правьдьныимъ! А о томь, еже не възвратитися тебе въ плъть свою, не у время коньчати ся прити семо”. Си слышавъ, оскьрьбехъ зело. И глагола ми: “Не скьрби, ниже буди дряхлъ”.
И възнесе мя на аеръ седьмаго небесе, и слышахъ глас, глаголющь ми: “Доколе въ плъти хотяй жити въсходить?” И убояхъ ся зело и трепетьнъ быхъ. И пакы инъ глас слышахъ глаголющь: “Не деейте, да възидеть достойникъ Божий, сьде бо есть одежа”. И въпросихъ ангела, сущаго съ мною: “Къто есть възбраняяй ми, къто есть пакы повелеваяй ми възити?” И рече ми: “Възбраний убо иже надъ поющими из небесъ ангелъ, и повелевый ти сь есть Сынъ Божий, а имене ему не можеши слышати, доъдеже ис плъти своея изидеши”. И яко възидохове на семое небо, и видехъ ту светъ дивьнъ и неисповедимый, и ангелы бе-щисльны и правьдьникы. Видехъ етеры ишьдъше от одежь плътьныихъ и сущая въ одежахъ вышьнихъ, и беаху въ славе велице стояще, обаче на престолехъ своихъ не седяху, веньци же славы их беаху на нихъ.
И въпросихъ ангела и рехъ: “Почьто одежа прияша и престолъ славы и венець не приемлють?” И глагола ми: “Не приемлють ихъ ныне, дондеже сънидеть Сынъ Божий сы испьрва, обаче ведять, чии суть престоли ихъ и кое веньци. Егда сънидеть и будеть не въ зраце вашемь, и князь мира того, Сына его радьма простьреть руце свои на нь, и обесять и́ на древе, и убиеть и́, не ведый къто есть. И сънидеть въ адъ, и наго и пусто поставить се призрачие, иметь же и князя съмьрьть пленьника, и сътьреть вьсю силу его, и въстанеть 3 день, имея етеры првьдьникы по вьсей вьселеней, и възидеть пакы на небеса. Тогда приимуть си престолы своя и веньца”.
И по словесьхъ сихъ рехъ ему: “На неже тя въпросихъ на пьрьвемь небеси, съкажи ми, сьде бо обещася мне съказати, како въ ономь мире бываемая, сьде ведома суть”.
Еще ми глаголющю съ нимь, се етеръ ангелъ стоящихъ, славьней вельми възведъшаго мя и вьсехъ ангелъ, и показа ми книгы, и, разгънувъ, дасть ми. И видехъ писмена бяху не яко века сего. И почтохъ я, и се деяния иерусалимля бяху ту написана. И етеръ человекъ видехъ дела, ихъже азъ не ведахъ. Уведахъ убо въ истину, яко ничьтоже не утаить ся на седмемь небеси въ мире бываемыихъ. И въпросихъ ангела: “Къто убо есть сь преспеваяй ангелы въ славе своей?” И отвещавъ рече ми: “Преспеваяй аньгелы: сь есть великый архангелъ Михаилъ, моля въину за человечьство”. Видехъ же одежа многы, и престолы, и веньця многы лежаща; ангелов сия одежа, и престоли, и венци, темь блюдоми суть. И глагола ми: “Сихъ одежь мнози лишають ся от оного мира, веровавъше словеси оному, о немьже глагола ся тебе”.
