Том 3 (XI-XII века, священная история) полностью

Егдаже погребоша Адама[449] с венцом, иже свит и возложи на главу его от древа, от негоже изгнан бысть, иже принесе ему Сифь,[450] сынъ его, иже дасть ему аггелъ из рая, и возрасте древо из венца из главы Адамовы. И бысть велико, и велико и пречюдно возрастом на трое растуще. И въ едино стареющеся и пребысть седмерицею высочайши всех древъ.

От того же древа изнесе Тигръ[451] река из Рая и стояше на песце. Тако егда хотяше помянути Сиф отца своего Адама, и показа ему аггелъ древа, и сотвори огнь на реце, рекомой Яиле,[452] и память сотвори отцу своему. И то огнь будет неугасая и до веку всегда горит непрестанно. И лютыя звери стрегут того огня.

Да егда согрешит Лотъ[453] и прииде ко Аврааму[454] на покаяние, егда слыша Авраам и ужасеся велми, и пусти Лота, да погибнет, и рече ему: «Прииди и принеси огня, иже во Ниле реце». И шед Лот, и обрете вси зверие спяща, и възять три главня, и принесе къ Аврааму. И виде Авраамь, и позна, и удивися. И заповеда ему посадити их на горници месте и поливати водою. И рече: «Егда прорастят главня, тогда еси прость от греха того». Беше бо вода далече, 3-щ на день доносеше въ устех своих и поливаше главня, и тако прорастошя. И възыде древо пречюдно и прекрасно зело.

От того жде древа изнесе вода потопнаа. И егда исяче вода, древо оста при реце Мерстей.[455] Да егда изведе Моиси израильтены,[456] не имешя что пити, понеже бе вода горка. Моиси ходеше скръбно, воду искый. И сътвори молитву къ Богу, и показа ему аггель древо, и то древо лежаше връху и цъвтеше. И въземь Моиси от древа, и крестаобразно посади въ реце, и усладися вода от древа.[457] И израсте древо превеликое зело и чюдно, и преукрашенно.

Въпрос. Како зачяхуся та древа или како растеху тако?

Ответ. Егда насади Господь Рай, не бе ту тогда ни аггела, никого, тъкмо Господь и Сатанаиль.[458] И что велевааше Господь садити, Сатанаиль крадеше от въсекого сада тай от Господа и просыпа насреде Рая. Господь рече: «Ту будет тело мое и азъ самь ту буду, и будет тебе на прогнание». И изшед вънь. И рече Сатанаиль: «Господи, благослови, елика насадихове». Господь рече: «Ту есмъ азь посреде Рая». И егда изыде Сатанаиль, да видит древо свое, Древо его изгна изь Рая. И почръне Сатанаиль и бысть диаволь.

Древо же израсте на 3 стлъпы: единь стлъпь Адамь, 2 стлъпь Евва, 3 стлъп посреде самь Господь. Да егда съгреши Адам и Евва,[459] тогда паде Адамова чясть въ реку Тигрь и изнесе его. Да егда бысть потопь, на воде потопне изыде, да егда исяче вода, древо же израсте при Мерстей реце. А Еввина чясть паде въ Раи.

Въпрос. Како пакы съвъкупишася та древа въ Иерусалиме?

Ответ. Егда хотеше Господь Богъ да съзиждеть Соломонь[460] дом Божий, святый Сионь,[461] и спусти Господь пръстень Соломону, и обладааше бесовы въсеми. И създа дом Божий, святый Сионь. И искааше древо да покрыет церковь. И поведашя ему древо, еже посади Моиси въ Мерре. И шед и посече древо, и възяху древо 80 бывол. И омрачишася при Иордани,[462] и бысть буре велика, и потопи древо въ Иордани, и не обретошу его.

И сказаша ему другое древо, иже от главен бяша, и иде на древо, еже бе от главень. Беше бо народ мног, въсех 3 тысяш, людий, еже вероваху въ древо, то бо древо твореше чюдеса велика, и въси мнеху на том древе распятися хощет Господь. Егда хотеше древо сещи Соломонь, людие не даваху ему и глаголаху ему: «О Соломоне, не дамы тебе древо сещи животное. Где виде ты 3 главня проросли и чюдо творящу я велико? И мнози обретают от него спасение, понеже на нем распятися хотеше Господь». Соломонь мнозех порази и посече древо. И принесе е въ Иерусалимь. Людие же верующе въ древо събрашя ветвие древу и принесошу плачяще въ Иерусалимь, и позирающе на древо.

И принесе Соломон древо въ церковь, и не прияся, идеже хотеху поставити. И печалень бысть Соломон. И слыша Сивила[463] о древе и прииде видети е, и седе на древе, и подпали я огнь. Тогда Сивила рече: «О тръклятое древо». Въси же людие въпиаху единогласно: «О тръблаженое древо, на немже распятся Господь!» Тако Соломонь въздвиже древо и послони е въ церковь.