Един же мужь именемь Елисей древо делаше над Иорданемь, и спаде секира въ Иордань и въглъбе въ древо, еже потопи Иордань. И прииде и поведа Соломону. И шед и възяшу древо, и познашу е, и принесошя въ Иерусалимь, и приложишя къ церкви, и не прияся. И прислонишу и то къ другому древу. И рече Соломон: «О велие чюдо! Сиа древа пречюдна суть высотою и красотою, и не могошяся прияти. И где обрящем высочае тех древь ино древо?» И въпроси демоны, их же дръжаше печатию Господнею. Они же решя: «Знаемь древо далече въ Едеме велико и чюдно, и предивно. И страшно намь о том глаголати». Соломонь рече: «Завязую вы печатию Господнею, яже мне ся даль Богъ, идете и принесете зде, емше за връшие и за корение». И шедше демони и изяшу древо и с корене, и изяшя Адамову главу въ корени,[464] и принесошя въ Иерусалимь, и отсекошу древо от корениа.
И премиришу на земли древо и пресосувааше,[465] на церкви же велми не достааше. Соломонь рече: «О великое чюдо и предивно! 3 древа обретох, еже не обрящутся нигдеже таковыя, и велика чюдеса творят, на земли достааше, на церкви не достааше много. И въсе яко от единого древа суть». И послони их къ церкви, и постави стражие, яко да блюдут древа.
Въпроси Соломон демоны: «Колико есть от Едема до Иерусалима?» Демони решя: «50 тысящь и шесть сът и 53 милей места, измерили бо бешя место, колико есть».
Глава же Адамова стоаше въ корени и никтоже знааше ю. Соломон же изыде на ловь, и възят его буре напрасна. Единь отрокь его, носящи връхня царю одежду, не прилучися съ царемь, виде пещеру и въниде въ ня, съ собою имеше хръта и ястръба. И седящи виде пещеру кость, а не камень. Егда преста буря, изыде отрокь и обрете царе. И рече ему Соломонь: «О человече, камо ты дену мою одежду? Мене буре потопи, и почто ты неси обурень?» Отрок рече: «Господине, видех пещеру и вънидох въ ня съ хрътомь и ястръбом, а конь мой въне стоаше. И видех кость, а не камень пещеру?» Царь же наутрие иде и очисти ю от корениа и от пръсти. И позна, яко то есть Адамова глава, и како есть съ древом изнесена, и како даде Сифу аггель, егда Адам умирааше.
Въпрос. Како бысть то древо? Где ли възят аггель и даде Сифу?
Ответ. Иже крадеше Сатанаиль от Господа, и рече Господь: «Ты крадеши от мене, то будет тебе на прогнание». И тако прогна его. И израсте древо на трое — Адамова чясть и Еввина, посреде же самь Господь Богъ. Адамово древо изнесе Тигръ река, а Господню чясть даде архаггель Сифу и Сифь принесе Адаму, и извить себе венець Адам. И из венца того древо израсте. Еввина чясть на потопе изыде.
И яко позна Соломон, яко то есть Адамова глава, принесе посреде Иерусалима. И посла, и сънидошуся въси людие, и заповедавь им и рече: «Якоже мене видите творяща, тако и вы да сътворите». И възят камень Соломон и поклонися главе рече: «Покланею ти ся, яко и пръвой твари Божии», връже камень на главу и рече: «Побиваю тя, яко преступника Божиа». И весь народ връгошя камение. И сътворишя Лифострато,[466] еврейскы — «Побиение». Ту бо бысть съборище въсему Иерусалиму.
Да егда бысть предание Господа нашего Исуса Христа, приведошя къ Пилату Христа и два разбойника. Пилать повеле и сътворишу въ тех древех 3 кресты. И распяшя Христа на древе, иже израсте из главы Адамовы, а разбойника вернаго распяшя на древе, иже израсте от главень одеснуя Христа, а разбойника невернаго распяшя ошую Христа на древе, иже израсте въ Мерстей реце, еже посади Моиси.
Егда искааше Ирод[467] Господа нашего Исуса Христа убити, поять Иосифь[468] Богородицу съ сыном ея и съ Иаковом, братом Господним,[469] и идеху въ Египеть, якоже рече ему аггель. Беху бо въ горе той два разбойника съ женами и съ детми своими. Единь разбойникь жену имеше единь съсець имящи. И обе жене разбойничи имеху млады дети. Единому разбойнику жена болеше сердцемь люто за 6 дний, а другаго жена бе единемь съсцем, тъкмо свое детя питааше, а оноя умирааше гладом. Тогда яшу Богородицу съ отрочятем и съ Иосифом, и рече разбойник, емуже бе жена болна: «Не сътворимь зло сему человеку, ни жене его, и въздоит ми отрочя, 6 дний имать ничьсоже не въкусив». Тако пояшя и ведошу их въсвоясн. И въздои Богородица отрочя разбойничее 6 дний другых. И оздраве жена разбойнича, а чадо разбойниче бысть добре. И разбойникь рече: «Велие чюдо! Аще бы не пришла сиа жена съ отрочятем своим и оживила мое отрочя, умръло би». И проводишя Богородицу съ Иосифом и съ отрочятем съ дарами Велицеми.
Отрочята же разбойнича възрастошу и бышу разбойници, якоже и отци их. И егда приведошя къ распятию Господа нашего Исуса Христа, и емше их приведошу къ Пилату. И повеле Пилать обесишу их обе странь Господа. Егоже въздои Богородица и въпиаше одеснуя Господа: «Помени мя, Господи, егда приидеши въ царстви си».[470] А другый разбойникь нелепое глаголаше,[471] и тако испаде
Богу нашему слава въ векы. Аминь.
