Иереи же иудейстеи, вкупе съ людми своими, удивишася о бываемых и завистию тяжкою низъпадше, и пакы суетною мыслью съветъ сътворше, мышляху послати на святую Богородицю и на святыа апостолы въ Вифлеемь воины. И множество иудей, събравшеся, устремление творяху на Вифлеомь и яко от поприща единого узреша видение страшное, и от страха съпеншимся ногамь ихь, въспять возвратишася к роду своему. И все страшное видение поведаша архиереем. Они же, паче раждьгшися яростию, идоша къ игемону, вопиюще и глаголюще: «Погыбе языкь иудейский от жены сеа! Отжени ю от Вифлеема и от епархиа Иерусалимьскыа!» Игемонъ же ужасъся, яко слыша чюдеса, рече к нимь: «Азь ни от Вифлеема изгоню еа, ни от иного места». Иудеи же, паче вопиюще, и спасением кесаря Тивериа[479] заклинаху и, дабы апостолы изьгналъ от Вифлеема: «Аще ли сего не сътвориши, навадимь на тя кесарю Тиверию». Принуждень же, посла тысущника во Вифлеемь на апостолы. Святый же Духь къ апостоломь и къ матери Господни рече: «Се игемонъ послалъ есть тысущника на тя, иудеемь въставшимь на вы. Ишедши убо изъ Вифлеема, не убоитеся, се бо на облаце провожу вы въ Иерусалимь, сила бо Отца и Сына съ мною и с вами есть». Воставши же, апостоли изыдоша из дому, носяще одръ Владычицы Богородицы, и устремление сътвориша во Иерусалимь. И абие, яко рече Святый Духъ, на облаце восхищени, обретохомся во Иерусалиме, в дому Госпожине. И, ставше, пять дней молитву творихомъ, не почивающе.
Егдаже доиде тысущникь в Вифлеемь и не обрете ту матери Господни, ни апостолы, дрьжаша вифлеемляны, глаголя к нимь: «Не вы ли внидосте къ игемону, глаголюще къ нереемь бывшаа знамениа и чудеса, яко пришли суть апостоли от всех стран? То где суть? Приидете, внидете къ игемону во Иерусалимь». Не ведяше бо тысущникы, яко апостоли и мати Господня шли суть во Иерусалимь. Поимь же убо тысущьникь вифлеемляны, вниде ко игемону, глаголя, яко: «Ни единого не обретохомь». По пяти же дний уведевь же игемонъ и вси граждани и иереи, яко въ своемь дому есть во Иерусалиме мати Господня и со апостолы. Быша же пакы ту знамениа и чюдеса, множество женъ и мужей возопиша: «Святаа дево, рожешиа Христа Бога нашего, не забуди рода человечьскаго!» Сим же бывающим, наипаче движущеся людие иудейстии со иереи и, вземши дрова и огнь, наидоша, пожещи хотяще домъ, идеже бе мати Господня со апостолы. Игемонъ же стояше, зря, издалеча позоры деа. Егда доидоша дверий дому святыя Богородица мужие иудейстии, и се внезаапу сила огняна, изшедши изъвнутрь ангеломь, попали множество много людей иудейскыхъ. И бысть во всемь гради страхь великь. Вси, иже вероваху, славляху Христа Бога, рождьшагося от неа. Егда же виде игемонъ бывшее, възопи пред всеми людми, глаголя: «Воистину сынъ Божий есть, рожеися от девы, егоже вы прогнати мнесте, знамениа бо сии истиннаго Бога суть». Бысть же разделение между иудеи, и мнози во имя Бога нашего Иисуса Христа вероваша и бывшихь знаменихь.
Потом же яко быша вся чюдеса святою и славною материю Господа нашего, сущимь намь с нею, апостоломь, въ Иерусалиме, рече Святый Духь: «Весте ли, яко в неделю благовещение приатъ Мариа деваа от ангела Гавриила, и в неделю родися Спась въ Вифлееме, и в неделю чада иерусалимьскаа с ваиемь изыдоша противу Иисусови во сретение его, глаголюще: «Осанна въ вышнихь! Благословенъ, грядый во имя Господне!». И в неделю въскресе изь мертвыхь, и в неделю имать приидти судити живымь и мертвымь, и в неделю имать приити сь небесь въ славе и чести преставления ради святыа девы, рожшиа его».
