И в ту неделю глагола мати Господня къ апостоломь: «Возложите кадило, яко Господь грядеть съ вои ангельскыми». И се Господь прииде к нимь, седя на престоле херувимьстемь.[480] И всемь молитву творящимь, явися бесчислено множьство ангелъ с нимь, светло знамение предходя на святую деву пришествиемь единороднаго сына ея. И возгласи к матери, рече ей Господь: «Марие!» Она же отвеща: «Се азъ, Господи!» И рече ей Господь: «Не скорби, но да веселится сердце твое и радуется: обрела бо еси благодать; виждь славу мою, юже имамь со Отцемь моим». И, возревши, святаа Мариа, Божиа мати, виде славу на немь, еяже уста человеча не могуть исповедати, ни разумети. Господь же рече к ней: «Се ныне тело твое преложено будеть на рай, а святая твоа душа на небеса, в скровища Отча, въ светлость, идеже миръ и веселие». Отвещавши же святаа, рече к нему: «Наложи десницу твою и благослови мя». И простеръ Господь честную десницю свою, благослови ю, та же, дрьжащи, лобызаше честьную десницу, глаголющи: «Кланяюся десници сей, сътворившей небо и землю! Молю многохвалное имя твое, Христе Боже, царю всехь векь, единородный Сынъ Отчь, приими рабу твою, изволивый родитися от мене, смеренныа, спасениа ради рода человеча за неизреченное твое человеколюбие. Всякому же человеку, призывающу или нарицающу имя рабы твоеа, подай же ему помощь твою». Си же ей глаголющи, приступльши апостоли къ ногамь еа и, поклоншься, рехом: «Мати Господня, остави всему миру благословение, яко отходиши от него! Благословила бо еси его и въскресила погыбша, рождьши светъ всему миру». Помолши же ся, мати Господня рече въ молитве сице: «Боже, иже еси съ небесе послалъ благостию единороднаго твоего Сына вселитися въ смеренное мое тело и родитися от мене, помилуй весь миръ твой и всяку душу, нарицающу имя твое, святое и благое, да прославлена будеть рождешиа». И пакы, помолшися, рече: «Христе, царю небесный и Сыне Бога живаго! Приими всякого человека, призывающаго имя твое святое и благое, да прославлена будеть рождешия тя». И паки, помольшися, рече: «Иже вся можеши на небеси и на земли, и се моление приими: молю имя твое святое на всяко время и место, идеже бываеть память имени моего, святи место то и прослави прославляющаа тя моим именем, приемля таковыа на всяко приношение и всяку молитву и обетъ». Сице же молящися ей, Господь к ней рече: «Веселися, и да радуется сердце твое: всяка бо благодать и всякь даръ данъ ти бысть Отцемь небеснымь и мною и Святым Духомь. И всякаа душа, иже тя призываеть, не имать постыдетися, но да обрящеть милость, и утеху, и заступление, и дрьзновение в нынешний векь и в будущий пред Отцемь моимь небеснымь». Обращь же ся Господь к Петрови, рече: «Приспе время, начни пение!» Петру же наченшу пение, вся силы небесныа отпеша: «Аллилуя». И тогда лице матери Господни просветися паче света, и, возведшися, своею рукою благослови каждого апостола, и воздахом Господу Богу славу.
Простер же руце свои, приятъ святую и непорочьную еа душу. Во исхожение святыа ея душа исполнися вони благыа и неизреченна света место то. И се глас съ небесе глаголя: «Блажена ты еси в женах!» И, текше, Петръ и Павелъ и прочии апостоли облобызахом честнеи еа нозе, да ся быхом освятили. И мы сами оба-на-десяте честное же и святое тело, на одре възложше, понесохом. И несущим намь, евреинъ единъ, именем Иофониа, крепокь телесемь, устремлься, начатъ сметати на землю одръ, апостоломь носящимь. И се ангелъ Господень невидимою силою мечемь огненымь от плещу его отсече обе руце и по аеру при одре сотвори висети. И сему чюдеси бывшу, възпиша вси обретшеися ту людие иудейстеи, видевше, яко «поистине истиненъ Богъ есть, рожеися ис тебе, Богородице и приснодево Марие!». И той же самъ Иофониа, Петру повелевшу ему, да ся явять чюдеса Божиа, и вставше, въследь одра вопиаше, глаголя: «Святаа Марие, рождешиа Христа, помилуй мя!» Обращь же ся, Петръ рече к нему: «Во имя рождьшася от неа прилепитася руце, отятеи от тебе!» И абие словом Петровемь, руце от одра Госпожина висящии отшедши, прилепистася Офонии на месте своемь. И веру ятъ и прослави Христа Бога, рождьшагося из неа, емуже слава и дрьжава съ Отцемь и Святымь Духом и ныне, и присно, и в веки векомь. Аминь.
Благослови, отче.
