Отвещавь же, Петръ рече къ апостоломь: «Кождо, к немуже Святый Духь возвести и заповеда намь, известите матери Господа нашего». Отвещавь же азъ, Иоаннъ, и рех: «Азь, егда вхождахь въ святый олтарь службу сътворити въ Ефесе, Духъ Святый глагола ми, яко приближися время преставлениа матери Господа Бога твоего. “Ходи в Вифлеомь на целование ея”. И облакь светелъ восхити мя и въ дверех, идеже лежиши, постави мя». Петръ рече: «Азъ в Риме живый, къ утреници слышахь глась Святымь Духомь глаголющь къ мне: “Мати Господа твоего, оставляющи миръ сь, на небеса преставлением течение творить. Ходи в Вифлеомь на целование еа”. И се облакь светелъ восхыти мя. И видехь и прочая апостолы на облацех грядущая ко мне. И глас глаголя къ мьне: “Вси идете в Вифлеомь”». Отвещавь, Павелъ рече: «И азь въ граде, отстоящимь от Рима немалемь растояниемь, живы, въ стране, нарицаеме Тиверианъ, слышахь Святый Духъ, гласомь глаголющь ко мне: “Мати Господа твоего, оставляющи миръ сей, на небеса преставлениемь течение творить. Поиди въ Вифлеом на целование еа”. И се облакь светель восхыти мя и постави мя, идеже и вы». Отвещав же и Фома и рече: «И азь Индийскую страну прошедь, проповедаа Христовою благодатию и утвержаа сына сестры царе, именем Давдань, мною хотяше знаменатися в полате.[476] И внезапу Духь Святый глагола ко мне: “И ты, Фома, иди въ Вифлеем на целование матери Господа твоего, яко преставление на небеса творить”. И облакь светелъ восхыти мя и постави мя при вас». Отвещавь же и Марко, рече: «И азь по закону третиаа годины во Александрейстемь граде молитву творяхь, егда мя Святый Духь возхыти и приведе мя к вамъ». Отвещав же, Иаковь рече: «Мне въ Иерусалиме сущу, Святый Духь повеле ми, глаголя: “Буди въ Вифлееме, яко мати Господа твоего творить преставление”. И се облакь восхыти мя и постави мя пред вами». Отвещав же и Матфей рече: «Азъ прославих и прославлю Бога, яко сущу ми в мори влающуся и възмущьшимъся влънам, и внезапу облакь светел осени и волнение мутное на тихость преврати, мене же, восхыщь, постави пред вами».
И отвещавьше же такожде и отшедше и преже поведаша, како приидоша. И Варфоломий рече: «Азъ въ Фиваиде[477] бехь, проповедаа слово. И се Святый Духь глагола къ мне: “Мати Господа вашего преставление творить, иди убо на целование въ Вифлеемь”. И се облакь светелъ восхыти мя и приведе мя зде к вамь».
Си все поведаша святии апостоли, како приидоша къ Богородици и которою силою. И, воздевши руце на небо, помолися, глаголющи: «Кланяюся и хвалю и славлю многохвалное имя твое, Господи, яко призрелъ еси на смерение рабы твоеа и сътворилъ ми еси великоты, силне, и се блажать мя вси роди».[478] И по молитве рече апостоломъ: «Вложите кадило и створите молитву». И молшимся имь, громь бысть съ небесе, и прииде глас страшенъ, яко колесниц многих, и се множество вой ангельскыхъ. И глась, яко сына человеча, слышанъ бысть, и серафимы окрестъ храмины стоаху, идеже возлежаше святаа и пренепорочнаа Божиа мати, приснодеваа, яко вси сущии въ Вифлееме видящи вся чюдеса, вшедше въ Иерусалимъ, возвестиша бывшаа. Бысть же, грому бывшу, вънезаапу явися солнце и луна окрестъ дому, и съборъ прьвенець святых бысть. И сташа в честь и славу святыя. Видеша вси знамениа многаа бываема: слепыа прозирающа, глухыа слышати, прокаженыа очищающася и бесныя исцелевающа, и всякь, иже беше в недузи и язи, прикасающися внеюду стенахь храмины, с верою въпиаху: «Святаа Марие, рождшия Христа Бога нашего, помилуй ны!». И абие исцелеваху. Многь жь народ от Иерусалима и от когождо отечьствиа молитвы ради пришедше и слышавше бываемаа въ Вифлееме материю Господнею знамениа, приидоша на место, различьными недугы одрьжимы, просяще исцелениа и улучаху. Бысть же радость велика и неизглаголанна в той день от множества исцелевших и прозревшихь и славящихь Бога нашего и матерь его. Весь же Иерусалимь от Вифлеема хвалами и песнми духовными веселящеся, и пришедше возвращахуся.
