<p><strong>ОРИГИНАЛ</strong></p>СЛОВО ИОАННА БОГОСЛОВА О ПОКОИ СВЯТЫА ВЛАДЫЧИЦА НАША БОГОРОДИЦА И ПРИСНОДЕВЫА МАРИАБлагослови, отче.
Святей и преславней Богородици и приснодевей Марии по обычаю на святый гробь Господа нашего восходящи кадить и покланяющи святеи колени, моляще рождешагося из нея Христа Бога нашего дабы к нему шла. Видящи же ю иудеи ходящу на святый гробь, припадоша къ архиереом, глаголюще, яко на всякь день Мариа ходить на гробище. Призвавше же архиереи стража, еже беху учинили, да быша не дали никомуже молитися на святемь гробе, вопрашаху о ней, аще воистину си тако есть? Стражие же отвещавше, рекоша, яко ничесоже такова видехомь, Богу не оставльшу ихь честнаго прихожения ея видети. Во единъ же от дней, пятку сущу, прииде на гробь по обычаю святаа Мариа Богородица, и молитву ей творящи, архангелъ Гавриилъ, съшедь к ней, рече: «Радуйся, рожшиа Христа Бога нашего! Молитва твоа, вшедши на небо, приата бысть. Ты ныне по прошению твоему оставльши миръ сей, на небеса къ твоему сыну на животъ истинный непременяемый отходиши».
Слышавши же си от архангела, возвратися въспять въ Вифлеом,[472] имущи съ собою вкупе три девы, яже ей служаху, рече къ девамь: «Принесете ми кадилницу, да ся помолю». И принесоша по заповеданному им, и помолися, рекши: «Господи мой, Иисус Христе, изволивый из мене родитися великиа ради благости твоеа! Услыши глась мой и посли мне апостола Иоанна, да видевши его, начну веселитися. И посли же мне святыя апостолы твоа, и иже суть к тебе уже отошли и яже суть ныне на семь свете, на нейже есть кождо стране святымь твоимь повелением, да сиа видевши, благословлю многое и хвалное имя твое. Надею бо ся, яко послушати мене имаши, рабы твоеа, о коемждо прошении».
И молящися ей, приидох азъ Иоаннъ, Духу Святому восхыщшу мя на облаце от Ефеса[473] и поставльшу мя на месте, идеже лежаше мати Господня. Внидох же к ней и прославль рожьшагося из неа, рех: «Радуйся, мати Господня, рождьшиа Христа Бога нашего, веселися, яко с великою славою отходиши житиа сего». И прослави святаа Мариа Бога, зане приидохь азъ, Иоан, к ней, помянувь глас Господень, рекший: «Се мати твоа, и се сынъ твой».[474] И три девы приидоша и поклониша ми ся. И глагола ми Богородица: «Сътвори молитву и възложи кадило». И помолися, тако рекь: «Господи Иисус Христе, сътворивый чюдеса, и ныне створи чудеса пред рожешею тя. И изыдеть мати твоа от житиа сего, и устрашатся распеншии тя и не веровавше в тя». И яко створих молитву, глагола ми святаа Богородица: «Принеси ми кадилницу». И, приемши кадило, рече: «Господи, съврьши о мне, елико ми же ся обещалъ преже, даже не взыде на небеса, и яко, егда отхожу от мира сего, приидеши ты и множество ангелъ твоихь съ славою многою къ мне». И глаголахь кь ней азъ, Иоаннъ: «Грядет Господь нашь Иисус Христос Богъ нашь, и узриши и́, якоже ти ся есть обещалъ». И отвещавши, святаа Мариа рече ми: «Иудеи суть кляли, да егда умру, съжгуть тело мое». И, отвещавь, рехь ей: «Не имать видети истлениа преподобное и честное тело твое». И, отвещавши, святаа Мариа рече ко мне: «Принеси кадилницу и вложи кадило, и створи молитву». И бысть глас съ небеси, глаголя: «Аминь». И слышах азъ, Иоаннъ, глас, и рече ми Святый Духъ: «Иоанне, слышиши ли глас, реченьный на небеси?» И егда окончахь молитву, отвещавь, рехь: «Ей, Господи, слышах и́». И рече ми: «Глас сей, иже слыша, сказает пришествие братиа твоеа апостолъ будущее и святыхь Силъ, яко днесь приидуть к вамь».
Азъ же, Иоаннъ, о семь моляхся. И святый Духъ рече къ апостоломь: «Вси вкупе, на облакы вседше, от конець вселенныа съберитеся въ святемь Вифлееме. Ты Симоне-Петре из Рима, Павелъ от Тивериана, Фома от Индия внутрьнейшаа, Иаковь от Иерусалима».[475] Андреа, братъ Петровь, Филиппъ, Лука и Симонъ Кананей, почившеи, въсташа изъ гробь Святымь Духъмь, к нимже и рече: «Уже не мните, яко въскрешение есть ныне, но сего ради въстасте из гробь, да идете на целование и честь и чюдо матере Господня и Бога Спаса нашего, яко приближися день въсхождениа еа на небеса». Марко же сый и еще такожде, и той из Александриа прииде с прочими апостолы, якоже рехом — от коаждо страны кождо. Петръ же взятъ бысть на облаце и ста межу небом и землею, Святымь Духомь подпираемъ и подобно святымь апостолом. И темь, восхыщеномь на облацехь, обретохомся с Петром. И тако, Святымь Духомь съвокуплени, вси приидохомь къ матери Бога нашего и, поклоншеся, рехом: «Не бойся, ни скорби! Господь Богъ, рождеися ис тебе, изводить тя из мира сего съ славою». И возрадовавшися о Бозе, Спасе нашемь, возведься и седе на одре и глагола к нам: «Ныне веру яхъ, яко приидеть Господь нашь с небеси, и вижду и́, и такося изрешу от житиа сего, якоже видехь вы пришедша. И хощу, да ми повесте, како разумевше отрешение мое от телесе сего, приидосте ко мне и от коих странь и колицемь приидосте семо, зане тако ускористе на мое посещение, — не утаи бо мене Господь нашь Иисус Христос и Богъ всехь».
