Фараонъ же погна въследъ ихъ, и яко бысть посреде моря съ вои своими на колесницахъ и на конехъ, и истопоша вси егуптяне. И удари Моисий жезломъ в море, и покры я вода сюду и сюду, и ни единъ от нихъ не избысть. И море имъ гробъ бысть. Фараона же избави Богъ от потопа и веде и́ ангелъ Божий и въ градъ Ниневии, и бысть тамо царемъ 9 леть.[151] (...)
Якоже бо и змия, егда состареется и ослепеста очи еи и алчеть 40 дний и 40 нощий, дондеже ослабееть еи сила телеси, и тогда ябье совлечеть съ себе ветшаную кожю и будеть обновивъши ся, тако же и ты, жидовине, несмысленый, бессловесный, яко змий, пророчьства почитаеши, Бытью время ведаеши, обнови свое тело и прозри своима очима, сверзи ветшаную одежю, еже есть неверьство, и обновися святымъ крещеньемъ и притечи ко Христу и буди единогласникъ с нами. Въспомяни же и тогда сущюю Мариамь, сестру Моисиову и Арону, и како видящи чюдо, славяще Бога, собравъши ликъ женъ. Сама же взя бубенъ, а инемъ женамъ повеле две медянеи плесньци взяти, инемъ же руками плескати, сама же, наполнивъшися Святаго Духа, начать въспевати сице Господа, глаголющи. (...)
Слышалъ ли еси, жидовине, преславнаго чюдеси, како ти сынове издраилеви тогда сущии проидоша посуху посреде моря?
Слышалъ ли еси, жидовине, жесточающа Фараона противу Богу? Вы же по всему уподобистеся Фараону, видяще вся знаменья Божественая, бываема от Христа Сына Божия, ожесточистеся сердцемь, яко и Фараонь неверьствомь, на конець глубини морьстии преданъ бысть.
Смотри же, жидовине оканьне, яко ничимже еси лучши Фараона, но якоже онъ за безумье погибе, тако и вы без ума погибосте. (...)
По сем же вьздвигоша сынове издраилеви от моря Чермнаго в пустыню нарицаемую Сурь и идоша по пустыни 3 дни и 3 нощи, и не можаху пити воды, горка бо бе зело, и прозваша имя месту тому «горесть».[152] И възропташа людье на Моисия, глаголюще: «Что пьемъ? Се уже хощемъ измрети мы и скоти наши от воды сея, въ Егупте беахуть ны воды сладкы, а в сей пустыни пастися хотять телеса наша и изгоревше жажею водною. Ныне же покажи намъ воду, да пьемъ!» И велми зазлеша людие Моисию.
Возпи же Моисий къ Богу о людехъ техъ, и приде к нему Ангелъ Господень, 3 древа держа в руку своею: певгь,[153] кедръ, купарисъ. И рече Ангелъ Господень к Моисиови: «Си древа сплети аки пленицю во образъ Святыя Троица и всади я в воду Мерьрьскю, да темь осладиши воды Мерьския. Се древо будеть въ древо велико, се древо въ 4 краи Вселеныя разидется. Се древо Съпасение миру, симъ древомъ перваго врага лесть побежена будеть». И прочая хотящихъ быти сказа Ангелъ Моисию, по сем же отиде от него.
И створи Моисий тако, якоже повеле ему Ангелъ Господень. И сплете древо и всади ё во исходище воды при брезе. И рече Моисий: «Се древо жизнь будеть всему миру, се древо в велику честь приложится. По летехъ посекуть ё. Тогда будеть изволение прити Вышнему. Но по времени, егда изволить плотью явитися всему миру и освящая женьска естьства преступленье, и на се древо руками безаконьныхъ светь и истиньныи вознесется. И узрите животь нашь прямо очима вашима. Безаконьнии же ти скоро в пагубе обрящются, и възнесному на древо весь миръ поклонится. Якоже се древо ослажаеть воду, тако и распятаго кровь освятить древо се. Якоже бо древо Меры горькия воды ослади, тако и кресть Христовъ горька языцьская неверьства ослади. Ныне же вы премолкните, ропщющи на мя, симъ древомь вода осладися, вы же убо, приступльше, почерпете и напаяитеся и скоты ваша». И во ть час осладишася воды в Мерре, и начаша пити вси людие и скоти.
Слышалъ ли еси, жидовине, Фараонова супружнице оканьный, како ти прообразовася Господь в Троици сплетеньемъ древа разнолично? Како ли ти прорече Моисий и воплощение Вышняго, и о распятьи на древе, и о мирьстемъ спасении?
Отьтоле же поять Моисий сыны издраилевы и приведе я въ Елимъ, и ту беяху 12 источника воды и 9 ветви фуника. Сия источьникъ прообразова Господь 12 апостола верховная, иже предътекоша, яко рекы въ весь миръ. Яко источници убо точать струя и аще и тмами народъ черпа
9 ветвий фуника прообразовася 9 апостолъ ученикъ ихъ, якоже бо фуникъ ть възрастенья сладокъ вкусъ подаваеть, тако и апостоли сладкая ученья своя ино язычникомъ истачаху, яже и къ вере бо разумне и приведоша своими учении. (...)
По семъ взиде Моисий от Фавора моавля на гору на верхъ Фазга, еже есть прямо Ерихону, и показа ему Господь всю землю Галажю до Дана, и всю землю Ефремлю, и всю землю Манасиину, и всю землю Июдину до моря последняго, и пустыню, и окрестная села Ерихона града. И рече Господь к Моисиови: «Си земля, еюже кляхъся отчемъ вашимъ Авраму и Исаку и Иякову, глаголя: “Племени вашему дамъ ю”. И показахъ ю очима твоима, а тамо же да не внидеши».
