Вижь же, жидовине, како кровию пражнею знаменье обретосте, кровь бо агнеца непорочна образъ бысть крови Господа нашего Исуса Христа, еже речется Святая Святыхъ, почивающи на сердци святыхъ мужь и женъ, въ единици троицьствуя. Тогда же помазанье прагь, ныне же намъ кровь Христова; помазанье прагь же есть уста наша: тогда же и окропленье обою подбою, ныне же окропленье душе и телу святымъ крещеньемъ.
Тои нощи уби вся первенца егупетьския, понеже издраилю наречен бысть первенець и многы казни и томленья от егуптянъ прияше, темь и за первенца Издраиля первенци егупетьстии избьени быша, от человекъ и до скота.
И не бысть места, идеже не возпиша, разве и въ сынохъ издраилевыхъ. И возпиша же народи къ царю, глаголюще: «Отпусти, царю, отпусти сыны издраилевы. Аще ли ни, да умремъ вси ихъ ради». Царь же убоявъся и посла к Моисию и Арону, глаголя: «Аще хощете положити требу Господу Богу своему, да отидете вси». Тогда же отидоша вси съ сребромъ и златомъ и с ризами, когождо испросивъ подруга своего. И тако, тщи егупьтяны оставльше, отидоша, понеже убо людье издраильсти живущеи въ Егупте томимы, грады ихъ зижюще и храмы, а мьзды не емлюще. Того ради мьзду труда ихъ повеле взяти имъ Господь Богъ. И выпровадиша рабы Божия съ добыткомъ и с дары многими, яко заветь Божий бе ко Авраму, деду ихъ.
И въставъ Моисий начать сочити, кто поведа Иякову Иосифа жива въ Егупте, и о костехъ Иосифлехъ, како я изъобрести. Клятвою бо заклалъ бяше Иосифъ, глаголя: «Присещеньемь, имже присетить вы Господь Богъ, да изнесете съ собою кости моя».[146] Како же суть обретены въ Егупте за 400 лет
Егда же рече Господь Моисиови: «Изведи люди моя изъ Егупта со всимъ именьемъ ихъ», и створи ему Богъ 7 нощий въ едину нощь. И нача Моисий въпрашати, ходя, костии Иосифовыхъ съ свещами. И стрете и Марья и рече ему: «В реце суть костии Иосифови, въ Воилдаи».[148] И Моисий же вземъ свеща и поимъ съ собою 30 мужь, и вшедъ на реку и рече: «Возмися, Воилдаи, и кости Иосифовы». И не бысть явленья. И паки второе рече, и не бысть явленья. Третье еже написавъ хартию рече Воилдаю: «Возмися и положи на воде». И въступи рака Иосифова. Моисий же радъ бысть и взять раку, хартия же не взя. Но приступи единъ ихъ жестосердъ жидовинъ и взять ю. И многы главы възяша с собою отець своихъ.
И мнози иноплеменьници поидоша с ними за 3 дни. И бысть по трехъ днехъ ркоша к Моисиови и ко Арону: «Се уже 3 дни ходили есте, а заутра възвратитеся въ Егупеть, якоже есте рекли». Они же, отвещавше, ркоша к нимъ: «Повелелъ ны Господь, да не възвратимся опять въ Егупеть, но идемъ в землю, яже точить млеко и мед».[149] Они же почаша ся бити с ними и избиша у нихъ много. И рану велику даша имъ. Друзии же от нихъ убежаша и поведаша Фараону, еже створи издраиль. И рече Фараонъ всимь старейшинамъ егупетьскимъ и всему народу: «Се видите яко прельстишася сынове издраилеви, отбежаша от нас». И реша убо державы егупетьския: «Что створимъ? Да отпустихомъ сыны издраилевы, ныне уже не работають намъ». И рече Фараонъ: «Поидемъ въследъ ихъ, яко обишла есть тамо пустыни, яко узрять насъ въследъ себе, и тако ужасьни возъвратятся». И погна Фараонъ въследъ ихъ, поимя вся люди своя, поять же 600 колесниць избраныхъ, на нихъже беша воини по 3 стояще вооружени всюду. И постиже я противу Епавлии межю Магласомъ прямо в Сефомору, есть же место то в наричаемии Козматии.
И озревшеся сынове издраилеви, видиша, яко женуть Егуптяне въследъ ихъ, и возпиша людье к Моисию, глаголюще: «Зане бы намъ гробъ въ Егупьте изведе ны на место се, в пустыню сию!»
Моисий же рече к нимъ: «Господь Богъ бореть по насъ, вы же умолчите!» И удиви Господь Богъ чюдеса своя. И простре же Моисий руку свою на море и удари жезломъ в Чермьное море, якоже рече ему Господь, и раступися море на 12 пути, и поиде когождо с родомъ своимъ, и проидоша по суху посреде моря.
Тогда убо браконеискусьныя невесты образъ сдеяся чюдесы. Тогда убо Моисий разделитель воде бысть. Сде же архистратигь Гаврилъ служитель чюдеси бысть дивнаго Твоего Рождества Творца.
Тогда глубину пешь шествова не мокрьной Издраиль, ныне же Христа роди бе-семене Дева. Море по пришествии издраилеви пребысть непроходно, тако и непорочная Дева по рождестве Емануилове пребысть нерастьленьна. Сый бо и преже Сый, явлийся за человеколюбье, и облаку сущю то и в покровъ его.[150]
