И паки рече Господь к Моисиови: «Видихъ беду людий моихъ въ Егупте, но шедъ, изведи люди моя, яко измроша вси ищющеи душа твоея. Оставшии же по нихъ, не имуть силы что створити тобе». Рече же Моисий Господеви: «Что есмь азъ, Господи, яко мною изводиши люди своя? Но молю ти ся, Господи, избери иного могуща, или даси ми знаменье, да имуть ми веру людье твои, яко видех тя». И рече Господь к Моисиови: «Поверзи жезлъ твой на землю, иже имаши в руце своей». Моисий же поверже жезлъ, и абие бысть змий великъ ползая. Егоже увидевъ, Моисий отскочи. Рече же ему Господь: «Не бойся Моисий, но ими и́ за опашь». Моисий же преклонивъся, ять и́ за опашь, и бысть опять жезлъ.
Смотри же и сего, жидовине, како ли бывъ змий и в жезлъ претворися! Не вся ли есть възможна Богу створити, тако убо бысть и в Законе нашемъ. Въ лета цьсаря Костянтина чюдотворець Спиридонъ и епископ купрьский бысть. Въ единъ убо от дний и види некоего заимодавца, влачаща некоего нища. Сь же старець Спиридонъ видевъ змию ползающю, именемъ Христовымъ преложи ю въ гривну злату и вдасть ю заимодавцю. И по сем же паки искупивъся нищий, принесе залогь къ старцю. Спиридонъ же тъ блаженый претворивъ ю змиею, на землю и́ спусти.
Рече Моисий къ Господу Богу: «Молю ти ся, Господи, худоглаголивъ есмь азъ, рабъ твой, отнележе начахъ глаголати!» Рече же Богъ к Моисиови, глаголя: «Кто дасть уста человеку? Кто ли створилъ есть глуха или нема, или слепа видяща? Се азъ, Господь Богъ. Хощю тобою худоглаголивымъ срамити премудрыя егупетьския».
Смотри же, жидовине, словьсе его, что рече Господь Богъ Моисиови! То аще створи Господь нема и глуха и слепа и видяща, то уже вся възможна Богу створити, еже и бысть.
Моисий же възвратися в Мадиамъ и глагола во уши тестю своему вся си. Тесть же его Рагуилъ рече ему: «Иди с миромъ».
Въста же Моисий, поиде с женою своею и детми. И быша на стану, и сниде Ангелъ Божий и хоте убити Моисия, понеже бяше не обрезалъ плоти сынома своима и преступилъ законъ, иже заповеда Богъ Авраму. И ускори Чифора и взя скрижаль каменьну, и обреза сыны своя и избави мужа своего от рукы Ангела.
И явися Господь Арону и Левгию въ Егупте, ходящю по брегу рекы, и рече ему: «Иди противу Моисеева в пустыню». И иде Аронъ и стрете и в пустыни в горе Божии и целова и. И въздвиже очи свои, и види жену его и дети и рече: «Кто суть си?» И рече Моисий: «Се жена моя и дети мои, яже ми есть далъ Богъ въ Мадиаме». И бе зло въ очию Аронови, и рече: «Пусти жену и детие въ домъ отца ея». И створи Моисий тако. И отиде Семфора и два сына ея в домъ отца ея до годинъ, якоже помяну Богъ люди своя и изведе я изъ Егупта от руку Фараона.
И сказа Моисий вся Арону, еже глагола к нему Господь. И придоста въ Егупетъ, и явистася къ сбору сыновъ издраилевъ, и поведаста имъ вся реци Божия, и възрадовашася людие о словесе ихъ.
И ураниша заутра и идоша в домъ Фараоновъ, и палицю Божию взяста с собою. И бысть егда придоста ко вратомъ дому цьсарева, и 2 лва стояща, привязана ужи железными, и не можаше ни единъ человекъ ни прити, ни изити, разве и емуже цьсарь велить прити, и шедше кормилъци утолять львы и приведуть и. Моисий же и Аронъ придоста и въздвигоста палицю на львы и разъдрешистася лви. Приде же Моисий и Аронъ в домъ цьсаревъ, и лва внидоста с ними, радующася. Да якоже узьре Фараонъ, удивися велми и ужасеся, бяше бо взоръ ихъ, яко сыновъ Божиихъ.
И рече к нима цьсарь: «Что хощета?» И ркоста ему: «Пусти ны в пустыню, да положимъ требу Господеви Богу нашему и послужимъ ему». И убояся Фараонъ велми и рече к нима: «Идета днесь в домъ свой, а утро придета ко мне». И створиста якоже рече има цьсарь. И бысть, якоже отидоста, и посла цьсарь и призва Валаома волхва и сыны его Еноса и Акриса и вся чародея егупетьския. И придоша къ цьсарю и поведа имъ цьсарь, еже глагола Моисий и Аронъ. И реша чародеи к нему: «Но како суть пришли, скажи намъ?» И рече цьсарь: «Толико въздвигоста на ня жезлъ и раздрешистася и притекоста к нима, радующася». Отвещавъ же Валаомъ и рече: «Се, цьсарю, чародееве же суть, якоже и мы, а ныне посли по нихъ, да придуть, да икусимъ рець ею». И створи цьсарь тако и посла по нихъ. Они же взяста палицю Божию в руце свои и придоста къ цьсареви и глаголаста ему словеса Божия, рекуще: «Отпусти люди издраилевы, да створять требу Господеви Богу своему». И рече има цьсарь: «Но кто веру иметь вама, яко еста посолника Божия и по слову его еста пришла? Да что знаменье створите предъ мною, да изъвериться рець ваю?» И поспеши Аронъ и поверже палицю свою предъ цьсаремъ и предъ велможами его. И бысть змий великъ ползая. И створиша чародеи такоже, пометаша жезлы своя, и быша змиеве. Того ради Богъ попусти волхвомъ егупетьскимъ жезлы своя въ змия претваряти, да не ркуть к Фараону, яко волхвъ есть Моисий и волшествомь си творить, но супротивленьемъ супротивльшеся ему и потомъ изнемогоша.
