Въздвиже бо змий главу свою, иже в Моисиеве жезле и пожре вся змия ихъ. И рече Валаомъ волъхвъ: «Уже створилосе еста от дний первыхъ, якоже пожиралъ есть змий друга своего, якоже и рыба морьская пожре дружину свою, а ныне сътвори палицю свою опять, якоже и преже была; да аще можеши, палице будуть и наши палице пожертыя, и да уведаемъ яко Духъ Божий в тобе. Аще ли не можеши, то чародей еси, якоже и мы». И простеръ Аронъ руку свою и ять за хвостъ змиевъ, и бысть палица в руце его, и онехъ палице якоже и преже.
И заповеда Фараонъ принести грамоты всехъ боговъ егупетьскихъ, и чтоша предъ нимъ, и рече: «Се не обретохомъ Бога вашего въ грамотахъ сихъ, ни имени его виде». Отвещаста же и рекоста к цьсарю: «Аданай Саваофъ есть имя Его». И рече Фараонъ: «Кде есть Аданай, да быхъ видилъ его и глас его слышахъ и пустилъ быхъ издраиля? Не ведаю ли Аданая, не пущу издраиля!» И ркоша: «Бога еврейскаго имя возвася на нас от дний нашихъ, и ныне пусти ны, да идемъ в пустыню и пожремъ жертву Богу нашему. Отнеле же сниде издраиль въ Егупеть, оттоле не приялъ ничтоже от руку нашею. Аще ли нас не пустиши, ведая буди, яко разгневается и избьеть землю егупетьскую моромъ или мечемь».
И рче Фараонъ к нимъ: «Скажита ми силу его и храборьство его». И реша к нему: «Онъ есть сътворилъ небеса и всю силу ихъ, и землю и все, еже на ней, и море и всю рыбу ихъ. И родилъ есть светь и породилъ тму, и пущаеть дъждь и напаяеть землю. И створилъ человека, и скоты, и звери лесныя, и птица небесныя, и рыбы морьския. Тъ же створилъ есть тебе въ ложесьнехъ матери твоея. Тъ же вложилъ въ тя духъ животенъ и възрасти тя, и посади тя на престоле цьсарства твоего. Тъ же и отиметь душю твою от тебе и възвратить тя в землю, от неяже взят еси».
И разгневася на нь Фараонъ и рече: «Но кто есть во всехъ бозехъ людьскихъ, иже можеть створити мне тако? Рука же моя яже ся самъ створихъ». И объярися на ня велми и насилье имъ створити повеле. И томляхуть егуптяне издраильтянъ. Моисий же возпи ко Господу Богу, глаголя: «Почто преда люди своя, Господи?» И рече Господь к Моисиеви: «Се узриши, что створю Фараону рукою бо крепкою, испущю тя и мышцею высокою возведу тя от земля его. Азъ есмь Господь Богъ, явивыйся Аврааму, Исаку, Иякову и въдахъ заветь мои к нимъ, яко дати имъ землю Хананейску, на нейже земли самъ хощю обитати».[145]
И въздвиже Богъ гневъ свой на Фараона и на люди его. И удари язвою великою Фараона и егуптяны. Възврати воды ихъ въ кровь и наведе на землю ихъ жабы, и пьюще воду и внидяху въ чрева ихъ, и тамо в нихъ крехтаху. И в горньци же, и въ дъже теста ихъ лезяху, и в постеля ихъ, и нападоша на перси ихъ вши, възвыше дву лакоть, и на плоти ихъ бяхуть, яко пясти възвыше. И посла на ня Богъ звери польския растерзать ихъ, и змия, и скарпия, и мышца, и овады во очи ихъ.
И влезяхуть в храмы своя и въ кровы ихъ и замъкняхуся. И тамо внидяше Нилонифъ зверь, иже в мори живеть, а у него рукы 10 лакоть мужьскихъ; и взидяше на храмину, и раскрываше и, сягь рукою, отломляше замкы. И Богъ попускаше звери злыя на ня, и тамо лазяху, и измори скоты ихъ. И зажеже Богъ плоть ихъ огнем, и быша прыщьеве на нихъ от главы и до ногу, и въсмерде все тело ихъ. И зби град вино ихъ и все древо егупетьское и не остася ничтоже на нихъ.
И посше трава польская, и человеци, и скоти, иже бяху обретани в ней, измроша гладом.
И придоша на ня прузи и сънедоша я останкы града, и възрадовашася егуптяне, глаголюще: «То есть намъ кормля», и насолиша ихъ множество.
И посла Богъ ветръ из моря силенъ, и взя пругы и въверже я в море и солоныя, и не оста ни единъ пругь во всеи земли егупетьстий.
И посла на ня Господь тму за 7 дний, дондеже не видить мужь брата своего, яко ни рукы своея ко устомъ обратити.
Бяху же и евреи, иже не послушали Моисия и Арона ркуще: «Не идемъ в пустыню, измремъ гладомъ и моромъ». Изби Богъ в ты три дни темьныя, да быша не видили егуптяне, ни възрадовалися, ни рикли: «Якоже есть рана Божия на насъ, такоже и на онехъ». И вызмета Богъ тернье из винограда своего. И зя всякъ первенець изъ земля егупетьския от человека и до скота, даже и образи первенца ихъ, написани на стенахъ, и ти ся разбиваху, а иже бяху древянии, или златии, или сребрени, а ти разливахуся. А иже бяху первенци недавно погребени, вывлачахуть и́ пси и полагахуть и предъ отци и предъ матерьми. И возопиша гласомь великим сынове Хамови.
Таче призва Господь Моисия и Арона и рече: «Сеи нощи убьется всякъ первенець в земли егупетьстий, от человекъ и до скота, и во всихъ бозехъ егупетьскихъ створю отместье, азъ Господь Богъ когождо васъ. Сеи же нощи заколите агнець чисть непороченъ и омажете прагы кровью его, и да будеть кровь въ знаменье в храмехъ вашихъ, в нихже вы будеть. И узревъ, покрыю вы, и не будеть васъ погибнути ни единому». Створиша же людье жидовьстии, елико заповеда имъ Моисий от Господа.
