Ответ. Аще внидеши в келлии брата, или той в келлию твою, и речет ти: помолися, даже до трижды рцы: прости. И аще по третием пребудет прося, тогда со смирением сотвори. И ты трижды рцы кому, и аще не восхощет, остави: зло бо есть любопрение. И о всякой же вещи: или да понесеши вещь от некоего, или да подаси руку, даже до трижды проси. И аще не восхощет, престани с миром, и не оскорби его. И сей есть истинный путь Божий. В нем же внемли себе делати нелицемерно и чистым сердцем, Богу дающу тебе руку и помогающу благодатию Своею. Аминь.
Вопрос 320, тогожде. Аще присеет любовь, и дадут ми часть мою, и не имам нужды прияти ю: повелеваеши ли прияти мне ту, да не возмнюся ради воздержания не приимати? И иждиву ли ю требующим в больнице, или ни?
Ответ Иоанна. Аще имаши нужду от любве, брате, приими. Аще ли же ни, не приемли: зане раждается тебе тщеславие.
Вопрос 321, тогожде. Понеже случается, яко творю братии любовь, и аки славам и последует. Еда зле есть, да чрез авву сокровенно творю, или сам собою? Обучаюся бо тако. Како же свободится кто, отче, сея славы? Яко и десными и шуими сеется человеку.
Ответ Иоанна. Обоим онем вещем должен еси внимати, яко имут вину в тщеславие. Но обаче еже чрез авву сотворити легче есть, яко к самому себе имать сердце твое вину. А еже самим собою, сугубую имать брань: не точию от сердца твоего, но и от человеков. А еже свободитися от славолюбия и тщеславия, изшедших есть от ветхаго человека. Господь да подаст ти свободу сию о Христе Иисусе, Господе нашем, Емуже слава вовеки. Аминь.
Вопрос 322. Егда смежаю очи мои в собраниих, собираются помыслы. Убо добро ли есть? Или негли нечто мнюся странно творити пред сопредстоящею братиею, и соблазняются?
Ответ Иоанна. Аще поистинне смежением очес твоих Бога ради в собраниих собираются помысли твои, да не внимаеши некиим, аще, и якоже рекл еси, мнишися творити нечто странно пред сопредстрящею ти братиею.
Вопрос 323, тогожде. Понеже книги имею особныя, и помысл ми глаголет дати я общине, и безпечальну быти: егда общия суть монастырския, то и коемуждо даются в них чести. Подобне же и о одеяниих тожде помышляю. Рцы ми, отче, подобает ли сотворити тако? И кая должен есмь удержати одеяния за телесную мою немощь.
Ответ Иоанна. Аще отложити сия хощеши, то добро есть тако сотворити, якоже рекл еси, дати я в общину. Вся бо, яже общежития, Божия суть. А о одеяниих, ихже требуеши, держи, в рассуждении зимы, две дуламы коротковаты, гречески коловия глаголемыя, и едину рясочку, и ради лета две дуламы легкия, и едину рясочку. И паки зимою — душегрейку егда бывает великая стужа. Аще же не бывает, то куколь и мантии две, едину зимнюю, а другую летнюю, и два покрывала подобне, едино тяжкое, а другое легкое. Имеяй и власяницу, и возглавницу, требуеши бо сих. О тюфяце же, аще требуеши его, держи его. И аще приидет ти одежда и нуждаешися в ней, держи ю. И даждь, вместо ея, ветху авве. Аще же не требуеши приходящия, такожде отдаждь ю авве. Господь да укрепит тя, еже слышати и творити. Сие есть по Богу успеяние и исправление.
Вопрос 324, тогожде к великому старцу. Зане же в служении сем больницы судисте ми быти, скажи ми, отче, аще должен есть чести врачебныя некия книги, и обучатися составляти врачевания собою? Или паче буду без попечения от таковых, аки разсыпающих ум, и избегну их (да не како и аки не трезвящуся ми, родят тщеславие), довольствуяся имиже вем словесы, и творя, елика бывают от елеа, и муки, и примазов, и таковых просте, в нихже и не чтущий тщание творят. Что убо сотворю? Трепещет бо сердце мое в служении сем, да не како погрешу в нем, и к страстем другия грехи приложу.
Ответ великаго старца. Понеже не у приидохом в совершенство, да совершенне пременимся от пленения страстей, уне есть поучатися, паче во врачебных, а не в страстных. Но не должни есмы на тая имети надежду, но на умерщвляющаго и оживляющаго Бога, глаголющаго: «поражу и Аз исцелю» (Втор. 32, 39). Прочитая убо та, или вопрошая кого о тех, не забуди, яко без Бога исцеление не бывает никомуже. Вдаваяй убо себе в сие, имени Божию вдавати должен есть, и помогает ему. Врачебная бо хитрость не возбраняет кому благочествовати; но имей тую, яко рукоделия братняя. Со страхом Божиим твори, еже твориши, и сохранишися молитвами святых. Аминь.
Вопрос 325, тогожде. Понеже иногда ми рекл еси, яко в сем отсецает кто свою волю, во еже не любопретися составити свой разум, — что убо, отче, яко приношу вещь больному, аки полезну, и многажды вредит его, и скорблю, яко волию в сем составив; паки, вижду, яко весь день в попечении есмь, и аки не допущаемь ни Бога помянути и паки стужение приемлю от чревобесия. Рцы убо ми, что сотворю? Верую бо, яко отсюду ми есть спасение.
