А поминал есмъ, живучи у Пресвятей Троици и у Пречистей Богородици, слово Иоанна Предотеча, рекшаго къ старцу, хотящему отъити от вертепа и ити в Синайскую гору,[1050] сице: «Сий тебе вертепъ лучши Синайскиа горы, аще живеши в нем с верою». Тако и вы, братие, поживите с верою у Живоначалней Троици и у Пречистей Богородици, не отходя.
А нечто Богъ изволит, и государь вас учнет жаловать, или учнетъ участие земли давати, или грамоту ободную,[1051] и вы у него не емлите, занеже ободная земля — десница Светодавцова и риза Пречистей Богородици, и образ ея чудотворной Та хранит от всякого зла. Аще учнете любовъ нелицемерную межи собою имети и роптаниемъ аще Светодавца не разгневаете и Пречистую его Богоматерь, и учнете тружатися с радостию и от своих праведных трудов питатися, и надеюся милости Божии и Пречистей Богородици на вас пребывати, якоже и на мне, грешнем. А нечто Богъ изволит и Пречистая Богородица положити государю на сердце, или милостыню учнет давати по своих родителехъ, или на свечи и на фимьянъ,[1052] и на пшеницу, и вы то от государя приимете с любовию, яко от Светодавцовы десници, занеже не вы у него того просили, но Богъ и Пречистая Богородица на то его вразумила.
Азъ же, многогрешный старецъ Мартирие, не своим изволением, но Божиим благоволениемъ и Пречистыя Богородица поможением вселихся в сию пустыню, на сие святое место.
Еще же живущу ми на Луках на Великих в Сергиеве монастыре съ строителем Боголепомъ въ единой келии, за седмъ лет до вхождения моего в сию пустыню, явися мне Пречистая Богородица образом своим честным, не яве, но сонным видением, сице. Бывшу ми во обители той понамарем, и взыдох на колоколню в полдни, и уснухъ. И видех во сне столпъ огненъ яко бы в сей стране стоящъ. Притек же аз ко огненому столпу оному и видех у столпа оного стоящъ образ Пречистыя Богородица Одегитрие,[1053] на золоте, в меру, яко есть на Тифине[1054] стоит образ Одегитрие въ церкви за крылосом[1055] на левой стране, поставлен ис Старые Русы.[1056] Аз же яко бы у образа того приложился, образ же той горяч велми от оного столпа огненаго. Возбнув же от сна и во ужасе быв от видения того, осязав же рукою своею чело свое, и ощутих е горяче.
Егда же приидох в пустыню сию, после того видения за долго время, и возлегох опочити, и уснух. И видех во сне у пустыни той море, и на том мори образ Пресвятыя Богородица Одигитрие, яков же и преже явльшийся мне, плавает. Аз же стоях на брегу и видех от того образа недалече на том же мори бесъ поражен лежащъ. Аз же возрех на правую страну и видех на воздусе стояща архаггела, образом же бе, якъ Гаврил архаггелъ пишется у Благовещения Пресвятыя Богородица, со скипетром. Мне же восхотевшу знаменатися у образа Пресвятыя Богородица, яко и преже, но устрашихся воды морския, зане яко потопит мя. И глагола мне архангелъ онъ, стоящий на воздусе: «Почто не дерзаешь приити знаменатися ко образу Пречистей Богородици?» Аз же, грешный, отвещах ему, глаголя: «Господи, боюся». Онъ же глагола ми: «Чего боишися?» Аз ему паки рекох: «Бесовского шатания, да не како мя уловит». Архангелъ же паки рече ми: «Не бойся, дерзай къ Пречистому образу». Абие же образ той нача грузитися в море, и оставляется верху воды образа того ношка Светодавцова. Аз же виде Божие милосердие к себе, что мне оставляется ношка Светодавцова. Аз же, грешный, яко бы есмъ в себе помыслил, глаголя: «Аще мне и случится потоплену быти от воды, но дабы мне принятися за ношку Светодавца». Абие дерзнух внити в море и ях его за ношку обема рукама, и начах плакати со слезами, глаголющи: «Милостивый Светодавче, аще и потоплену ми лучится быти, но дабы с тобою». И абие аки некоторою бурею пренесе мя образ той чрез море и постави мя на брезе, на друзей стране моря. И невидим бысть образ той от мене. И еще видех: и се град новъ, и лавицы новы, а купующих и продающих несть. И абие возбнувъ от сна, и во ужасе бых велицем, и умилихся о видении томъ.
Бе же два образа чюдотворныя, образ Живоначалныя Троици да Пречистыя Богородици, стояху в первоначалной келии моей на стене, пред ними же стояше светилникъ с маслом горящъ. Аз же, взявъ образ чюдотворный Пресвятыя Богородица на руки свои, начах со слезами плакати, глаголя: «Царице госпоже Богородице, что мене, грешнаго, посещаеши милосердиемъ своим? Азъ бо, окаянный, горчае бесов!» Абие же прииде ко мне, не вем откуду, глас, не во сне, но яве, глаголя ми: «Подвизайся, узришь бо и не ту едину Божию благодать». Потом же Феодор Сырковъ[1057] повеле мне церковъ с трапезою поставити во имя Благовещения Пресвятыя Богородица.
