И тъгда Иродъ, пущь въ тьмьницу, усекну Иоана.[398] Съконьча же течение Предтеча Господень и съниде въ адъ. И познаша и́ сущии въ аде. Ту бо беша Аврамъ, и Исакъ, и Яковъ, Исайя и Давидъ[399] и прочее множьство святыихъ пророкъ. И въпрашаху Иоана о Господи, глаголюще убо: «Идеть ли свободитъ насъ от скьрбий сихъ или ни? И съконьчаеть пророчьствованая о немь?» Они же глаголаху: «Еда како не хощеть съмьрти прияти насъ ради?» Пророци же укрепляхуся, глаголюще, яко «Съмьрьть ему есть прияти, разумехомъ бо мы хотящая ему быти и тако прорицяхомъ вьсему миру». Отъвеща Иоанъ и рече: «Придете, молю вы, поведите ми, чьто прорицясте, да и слышавъше и подъвижьни будемъ». Отвеща же пьрьвый пророкъ и великый Давидъ и рече: «Азъ разумехъ, яко безмълъвый тихо съходить съ небесе, и рехъ: “Сънидеть, яко дъждъ на руно”».[400] Исайя рече: «Азъ разумехъ, яко от девы хотяше ся родити, и рехъ: “Се дева въ чреве прииметъ и родить сынъ и нарекуть имя ему Еммануилъ”».[401] И другый, отвещавъ, рече: «Азъ разумехъ, яко въ дъвою на десяте место патриарху 12 ученика хотяста служити ему,[402] и рехъ: “Въ отець твоихъ место быша сынове твои”».[403] И другый отвеща: «Азъ дела и чюдеса, яже хотяше творити, разумехъ и рехъ: “Отвьрьзуться очеса слепыихъ и ушеса глухыихъ услышать”».[404] И другый, отвещавъ, рече: «Азъ разумехъ, яко ученикъ хотяшеть и́ предати, и рехъ: “Ъдый хлебъ мой, възвеличилъ есть на мя клевету”».[405] И другый рече: «Азъ разумехъ, яко на трьхъдесятьхъ сребрьницехъ хотяашеть и́ предати, и рехъ: “Поставиша цену мою 30 сребрьникъ”».[406] Исайя же пакы рече: «Азъ разумехъ, яко на судище хощеть
Си же пророкомъ глаголющемъ и веселящемъся о благовещении Предтечеве. Слышавъ же Адъ глаголы ихъ, рече къ дияволу: «О комь си глаголють, высокомысльний? Къто же ли есть радость творя имъ? О комь же ли благовествують имъ, не веде, тъкъмо въ нихъ вижю велию радость». Отвеща дияволъ и глагола ему: «Ничьсоже не ужасайся, вьсьма не бойся глаголъ ихъ:
