Въ единъ убо от дний цьсарь Фараонъ виде сонъ: седящю ему на столе царства своего въ Егупте и въздвигь очи свои, виде старца стояща противу ему, а в руку его скалвы. И въкладе въ едину скалву вся старца егупетьския и вся велможа его, а въ другую скалву въкладе вси агньци. И убудивъся и урани заутра, и созва вся рабы своя и поведа имъ сонъ. И ужасошася людие страхомъ великымъ и рче волхвъ Валаомъ:[126] «Се въстанеть зло въ Егупте в последняя дни». И рече цьсарь: «Что будеть, скажи намъ». И рче Валаомъ к цьсарю: «Отроча родится во Израили и растворить все царство Егупетьско, ведая буди цьсарю, да напиши въ законехъ егупетьских, да истопять всяко отроча, иже родится в жидехъ, да убивають и».
И призва бабы жидовьския и повеле имъ убивати младенца, и другыя метати в реку. Бабы же убояшася Бога, не створиша тако, якоже повеле имъ цьсарь егупетьский Фараон. (...)
Жены же жидовьския изхошаху въ поле и ражаху. Ангели же Божии искупаху дети и повиваху, и вложаху въ обе руце имъ два камени, да изъ единого ссаху масло, а из другаго медъ. И выихожахуть егуптяне на поле искатъ ихъ, и повеленьемъ Божиимъ отворяцися земля, приимашеть я. Они же идяху по плугы и по рала своя и не можаху обрести, яко Богъ храняше тая. И възрастьше на поли, прихожахуть тмами в домы своя. И умножишася людие жидовьстии и расилнеша въ Егупте. Цьсрь же егупетьский Фараонъ не любляшеть, яко множится Издраиль.
Мужь же бяше во Издраили именемъ Амбрамъ. И поя жену собе Агавефь, родыню свою. И роди дщерь и нарече имя ей Маримьянии. Во дни бо ты почаша сынове Хамови[127] озлобляти животь сыновъ Издраилевъ. Амбрамъ же зача и роди сынъ и нарче имя ему Аронъ. Во дни бо ты нача Фараонъ проливати кровь на землю отрочать, а другыхъ метати в реку. Тогда отлучишася мнози от женъ своихъ, и отлучи же ся и Амбрамъ от жены своея. И бысть в годину ту на конець 3 летъ, бысть духъ Божий на Мариамии и, пророчьствовавъ, рече: «Се сынъ родиться у отца моего в годину сию, и ть спасеть Издраиля от руку Егупетьску».
Слышав же се Амбрамъ у Мариамии, възврати жену свою въспять к собе и поя ю въ 6 месяць и, заченши, роди сынъ и нарче имя ему Немелхия. И наполнися храмъ светлости, и виде жена детя, яко добро есть, и схрани е 3 месяци въ скрове.
Въ дни же ты заповедаша егуптяне носити дети своя младыя по хоромомъ жидовьскимъ, негли бы ся отмолвило детя жидовьское к детяти егупетьскому. Жена же та убоявшися того, створи ситянъ яскъ и умаза и́ глиною из дна, а из вону смолою, и вложи тамо детя, и пусти е межю ситьникы надъ рекою. Сестра же его ста издалеца, его зрящи.
И посла Богъ зной на землю егупетьскую, и взопреша человеци. И сниде дщи Фараонова Ферьмуфь искупаться на реку съ девицами и со многими женами. И узре ситянъ яскъ плавающь на реце и пославъши рабыня взятъ и́. И откры, и виде в немъ отроча плачющеся, и помилова его, и рче: «От детий се еврейскъ есть». И нарече имя ему Моисий, глаголющи, яко от воды взяхъ его.[128] И приведоша жены егуптяныни доить его, и не хоте съсати, от Бога бо бяше, яко возвратити къ сесьцю матерьню. И рече Мариамь: «Хощеши ли, да ти приведу жену доилицю от жидовъ, и въздоить ти детище се». И иде, и приведе матерь его, и рече ей дщи Фараоня: «Въздои ми детище се, и вдамъ ти по две сребреници на день». И взя у нея и въздои его.
И бысть на конець дву лету и принесе и ко дщери Фараонове, и бысть ей въ сынъ. И бысть въ третьее лето къ рождеству Моисиову, Фараонъ седяше за столомъ, цьсарица же одесную его, Фермуфия же седяше ошююю его. Детя же седяше в пазусе ея, и вельможа седяху окрестъ его.
Детя же, сягь, сня венець съ главы цьсаревы и възложи на главу свою. И ужасеся цьсарь и велможа его. И отвещавъ Валаомъ волхвъ и рече: «Помяни, господине цьсарю, сонъ, еже еси виделъ и како протолкова рабъ твой к тобе. Се есть детя еврейско яко духъ Божий есть в немъ, и премудростью створилъ есть се, и хощеть прияти цьсарьство Егупетьское собе. Тако бо створи Аврамъ, дедъ его, иже цьсарь перея славу ихъ: Авимелеха цьсаря агарьскаго прогна, а самъ приходить въ Егупеть, и нарче жену свою сестрою, якоже бы погубилъ цьсаря ихъ.[129] Тако же створи Исак иноплеменьникомъ и расилне от иноплеменьникъ, цьсаря же ихъ хоте погубити, обретъ, такоже жену свою сестрою потвори.[130] Ияковъ такоже во льсти взя брата своего первенецьство и благословение. Иде в Понорамъ[131] къ Лавану, уеви своему, и поя лестью дщерь его, и скоты его, и весь домъ его. И бежа в землю Хананейску, възвративъся. И продаша сынове его Иосифа, и бе в темници доньдеже виде сонъ цьсарь, отець твой. Пусти и́ ис темници и възвелица и́ надо всеми велможами егупетьсками, понеже протолкова сонъ. И бе егда пусти Богь гладъ на землю, пославъ приведе отца своего и братью свою въ Егупетъ. И корми и́ безъ искупленья. Насъ же искупи собе рабы. Да аще хощеши, цьсарю, да убьемъ отроча се, да не възрастеть, ни возметь цьсарьства твоего от тебе, и да не погибнеть надежа егупетьская».
