Моисии же бяше 20 и 7 лет, егда ста цьсаремъ надъ срачины. Бысть же во вторый день цьсарства его, собрашася вси людье и реша ему: «Цьсарю, промысли намъ, что створимъ: 9 лет мину, да не видехомъ женъ своихъ и детии». И рече цьсарь къ людемъ своимъ: «Да аще слушающе послушаете гласа моего, ведаите, яко преданъ будеть градъ сь в руце наши. Сечемъ ли ся с ними, якоже поченше, то погибнеть насъ много, якоже и первое. Аще ли поидемъ на плотехъ во омуты, то потонеть насъ много, якоже и первее. И ныне же, въставше, идете в лесъ и принесете сыны стерковы, кыйждо свой. Храните же я, дондеже възрастуть. Научите же я перелетывати ястрябьскы». И идоша и принесоша сыны стерковы, якоже повеле имъ Моисий.
И бысть якоже възрастоша стеркове, и заповеда цьсарь заморити я гладомъ за 7 дний. И створиша людье тако. Бысть же день тритий, и рче к нимъ цьсарь: «Облачитеся во оружья своя и всядите на коня своя и возмете кыйждо стеркъ свой на руку, и поидемъ да приступимъ къ граду на то место, идеже змиеве суть».
И рече цьсарь: «Пущайте стеркы». И пустиша, и летеша стеркове на змия, и поедоша я, и испразниша место то. И бысть, яко узре цьсарь и людье, яко погыбоша змиеве и испразнися место, и въструбиша людие трубою и оступиша градъ, и взяша и́. И придоша когождо в домъ свой. И убиша гражанъ во тъ день 1000 и 100 мужь, а внешнихъ не убиша ни единого мужа. И узре Валаомъ волхвъ, яко взятъ бысть градъ, вседъ на конь с двема сынома своима и бежа в землю Мадиамьску къ цьсарю Валаку. То ти суть волсви и чародеи, иже суть писании въ Пармии,[134] иже научаху загубити племя Иаковле от лица земли. (...)
Моисий же седе на столе въ срачинехъ, жена же Киканосова бяше за ним. И възбояся Моисий Бога, не приходи к ней, помянувъ, яко закля Аврам Елеазара, раба своего: «Не поимай жены сыну моему от дчери хананеискъ».[135] Исакъ же заповеда Иякову, сыну своему, не сватитися съ сыны Хамовы, яко продани суть в работу сынамъ Симовымъ и сынамъ Афетовымъ.[136] И убояся Моисий Бога своего, и не прикоснуся к жене Киканосове, и та бо есть отъ сыновъ Хамовъ.
Расилне цьсарь Моисий и воевася съ едемляны и примучи я, и одоле на войнахъ своихъ Ияковъ, дедъ его, с нимъ.
Въ лето 40-е цьсарства его и Моисий седяше на престоле 40 лет, цьсарица же седяше по стороне его. И рче царица к людемъ и к велможамъ: «Се днесь лет 40 цьсарствующю Моисиови надъ вами, и ко мне не прикоснуся, богомъ же нашимъ не поклонися. И ныне послушайте мене, сынове срачиньстии! От сего дни не буди се цьсарь надъ вами. Сей вы есть Мукарисъ, сынъ мой, и ть да цьсарствуеть надъ вами. Лепле есть вамъ слушати сына господина своего, нели мужа страньска». И быша людие вси сварящеся оли и до вечера, и не хотяху отпустити Моисия. И преможе цьсарица. И ураниша заутра и поставиша Мукариса цьсаремъ надъ всими. И убояшася людие прострети рукы на Моисия, яко бояхуся, присягше к нему. И вдаша ему дары великы и отпустиша и́ съ честью.
И изиде Моиси оттуду путемъ своимъ. Моисий же бысть 60 и 7 леть, егда изиде от срачинъ. От Бога бо бяше створенье то. Пришла бо бяше година, яко уготована от дний первыхъ, извести сыны издраилевы от Егупта. И иде Моисий в Мадиамъ, бояше бо ся въспятитися въ Егупеть.
И седе на студенци, и выиде 7 дщерий от Рагуила Мадиамьскаго паствить овець отца своего. И придоша ко источнику тому и почерпоша воды напоити овца. И приступиша пастуси мадиамьстии и прогнаша и́. И въставъ Моисий, спасе я́, и напои овца ихъ. И възвратишася ко отцю и поведаша, что створи имъ Моисий, и како спасе я́ и напои овца ихъ.
И посла Рагуилъ и поя и́ в домъ свой. И еде съ нимъ хлеба, и поведа ему Моисий, како избеша изъ Егупта и како цьсарствова въ срачинехъ и како отяша у него цьсрство и пустиша и́. И бысть, яко услыша Рагуилъ рець его, и рече в сердци своемъ: «Всажю азъ сего в темницю и примилуюся имъ къ срачиномъ. Се бо есть беглець». Имше же его и въсадиша в темницю, бе же в темници 10 лет.
