enstrade por trovar la dicita loko. Me esas fortunoza savar la Germana
tante plu ke la lokala Germani esas tre afabla ed helpema, ma me havas
desfacilaji por atingar la aludita manjeyo e me arivas kande la cetera
personi finas la dineo. Me esas tre deskontenta. Fine, me tamen divenas
plu serena per komendar ed obtenar ecelanta repasto. Vespere ye 21 kloki
esas diskurso da D-ro Detlef Groth en nia albergo. Ico esas kelke
problematra por la ne-Germani pro ke lu parolas tre rapide e ke me povas
komprenar nur peceti de lua parolado.
Ye la 21ma di agosto (saturdio) matine, nia grupo guidata dal GIS
prezidanto Frank Kasper eniris autobuso qua vehigis ni til la anciena
quarteri dil urbo Tübingen. Ibe ni povis marchar ed admirar la belega
desnova florizita stradi e stradeti. Nin rajuntis s-ino Suprayan ed el guidis
ni tra la urbo ed explikis a ni la detali di lua arkitekturo. Ni saveskis ke
Tübingen esis tre prosperoza urbo ye la fino dil Mezepoko e multa domi e
splendida konstrukturi, bone e sorgoze flegata, evas de ta epoko. Ni rividis
la kastelo e lua rempari. La dicita kastelo evas de la frua Mezepoko ma
rikonstruktesis en 1060. Sur la fasado dil eniro-pordego dil kastelo
grabesas en la Franca ita epigrafo: «Honi soit qui mal y pense»
(Konsputata esez ta qua male pensas pri to). Ico esis la klamo dal Angla
174
rejo Edwardus III kande il kreis la ordeno dil Gartero en 1340, cirkume.
Pro quo ica Angla moto (en la Mezepokala Franca idiomo) esas grabita
sur la muri di Germana kastelo ? Ico esas misterio quan me ne sucesis
klarigar per serchado che la interreto. Pose ni retroiris a la merkato-placo.
La charmo, la romantikeso e la beleso unika di ta anciena stradi tante bone
konservata facinis nia Angla samideano Robert Carnaghan. Oportas
tamen anke dicar ke Tübingen esas un de la skarsega German urbi, qui
ne devastesis dum la triadekyara milito (1618-1648) e ke ol anke
indulgesis dum la duesma mondo-milito pro ke ol esis universitatal urbo.
Cetere s-ino Suprayan citis a ni sentenco pri Tübingen :
kelka personi e me dejunis en ekologiala restorerio por vejetaranti jacanta
an la merkato-placo. Ibe la dishi ne aspektis aparte apetitigiva, ma kande
me manjeskis li, me konstatis ke oli esis multe plu saporoza kam me
kredabis. Inter nia samtablani esis la extraordinara poligloto Donald
Gasper, qua parolas me ne savas quanta lingui ed omna interlingui
perfekte. Il parolis kun ni, e kun la yuna jurnalistino invitata dal Idisti, tre
bone en la Germana.
Pos la dejuno ni retroiris a la merkato-placo e sur la loko ube, ye la antea
dio, esabis la estaleyo dil Idisti, videsis nun estaleyo di islamisti jerata da
tri o quar barboza viri, qui propagis favore a la islamo ed a la korano. Per
ico me konstatis ke la Germani (diferante de la Hitler-tempo) divenabis tre
tolerema populo, nam en Francia esus granda posiblesi ke tala estaleyo,
en la maxim bona kazo regardesus tre enemike, en la maxim mala kazo
povus esar tumulto. Ma la benigna Germani observis ico afable e
destensite. Dicesez tamen ke la krizo produktita dal Mohamedista
enmigrado en Francia esas plu akuta kam en Germania pro la multe plu
granda nombro de Mohamedana enmigranti e pro la plu mala ekonomiala
situeso kam en Germania.
Plu tarde ni retroiris a nia albergo, la Germani por asistar la precipua yarala
kunveno dil GIS, e me por repozar. Kande vespereskis, nia samideano
Germana Manfred Magin vehigis kelka personi e me a la restorerio
selektita por ita vespero. Il havis granda desfacilaji por trovar ol e mustis
plurafoye questionar la homi enstrade. Vere, me havis l'impreso ke la
restorerii-serchado esis granda plago lor ica Ido-renkontro di Tübingen,
adminime koncerne me. Lor konversado dum la dineo, me saveskis da s-
ino Neussner ke en Germania lo esas tre ne-»politically correct»-a parolar
pri Cigani, ma on devas dicar le «Roma» e le «Sinti». La problemo jacas
en la fakto ke ne esas tre facila savar kande on devas parolar pri «Roma»-
i o pri «Sinti»-i.
Ye la 22ma di agosto (sundio) matine, esas ULI-kunveno, onu diskutas pri
la strategio di la movado, pri la futura Idorenkontro eventonta venontayare
en Luxemburgia e danke nia samideano R. Carnaghan me kooptesis kom
175
membro dil Direktanta Komitato. Pro ke la proxima restorerio Marquardt
(ne tre prizata da me nam lua dishi esis nek tre diversa nek tre rafinita)
esis klozata dum ica sundio, ni iris ad apene plu fora repasteyo, qua esis
Chiniana ed ube fortunoze, ma ne miraklatre, la dishi esis klare plu
saporoza. Ekirinte ica restorerio pos la repasto, me lektis dum pasar opoze
a Marquardt, ke ante la unesma mondomilito, ol esis la furnisanto di la
rejala korto lokala !!! Quala dekado depose !
