ANTOLOGIO полностью

La festo di Diwali asertite naskis kom la signo di samatempe partigita ed

intima feliceso, quoniam ica rejala paro inkarnacas avan omno l'idealo di

harmonio e mariajal amoro. Itaque, lor ita festo, la butiki e la domi mustas

esar maxim gastamanta segun to quo esas posibla. La palio-domi esas

sorgoze rinovigita, netigita e plubeligita por ke Lakshmi, deino dil richeso

e dil beleso, prizanta la lumo, povez apreciar li.

La origino di Diwali esas sat kontroversata. Segun altra legendo, ol

memorigus la morto di Narakasura, demono mortigita da Krishna,

enkarnigo di Vishnu, qua esas importantega deajo dil hinduismo. Diwali

do simbolizus la vinko di lo bona kontre lo mala.

Esez la lumo

La festo di Diwali obedias preciza kalendario. La unesma dio, Dhanteras,

konsakresas a la preparado : omna homi kompras nova vazaro por la

domo, arjenta objekti, qui esas simboli pri richaji, ma onu ne saciesas per

ico ed on kompras anke petardi, pirotekni e girlandi. La duesma dio, Chhoti

Diwali, konsakresas a la veneraco di Kali. La triesma dio, olqua esas la

maxim ecitanta, esas olta di la «senluna nokto». Nome, lo esas dum la

maxim obskura nokto, altre nomata Amavasya, ke mili de mikra flami

invadas la urbi. Multa personi selektas ita dio por inaugurar lia komerceyo.

Ye la krepuskulo on kustumas facar puja (donaco) por Ganesh e Lakshmi,

e dekorar nova konto-libro per swastika trasita per la sindur-pudro.

Lore la festo esas ye lua kolmo : mili de lakto-litri varsesas aden la fluvio

Ganga, la mulieri ekiras, eli havas brakii charjita per kandeli dum ke eli

vestizesas per lia maxim bela sari- i, ofte tote nova ed eli esas ornata per

lia maxim bela juveli. Eli depozas mili de bujii a maxim diversa loki, sursule,

sur la balkoni. India ita-epoke esas bruisoza : mili de petardi lansesas,

anke fuzei, on pleas muziko, onu kantas. La quaresma dio, Annakut, esas

olta dil celebro di la abundo : la almoni a la povri esas aparte jeneroza.

Grandega quanti de donacaji anke destinesas a Parvati, filiino dil rejo di la

monti. Le puja anke multopleskas dum ica lasta festo-dio.

Moderna Diwali

Diwali esas un de la maxim sorcanta Indiana festi, ol esas felicajo por la

okuli e la sensi. Tamen, desfortunoze, ol ne povis eskapar sendomaja de

la perversa efekti dil moderneso, ita nevinkebla demono, qua igis ol

divenar plu komercala festo. La yarmilala tradiciono existas kun plu

recenta praktiki, quale la utiligo di sempre plu forta, kustoza e polutanta

183

petardi. Recente, plura guvernerial aranjuri facesis por probar limitizar ita

kustumi qui kontredicus la hinduista precepti pri respekto a la naturo. Ico

esas koaktanta tradiciono...

Dum la recenta yardeki, ica festo internacioneskis per la Indiana

«diaspora» : la multanombra komunaji di ca populo dispersita tra la mondo

nule kareas facar homajo a la princo, segun la sunala kalendario hinduista.

Tale en Britania, ube la Indiani esas importanta 'etnala' minoritato, la

templi divenas plenega por veneracar Lakshmi.

Omnaloke, lo esas la sama atraktiva etoso, la sama incenso-parfumo, ed

ica incitado a la «supernatura» feliceso ed a la paco. Sen ke obliviesez la

spiritala konoco, olqua povas anke indikar la voyo di la lumo...

Segun interretal artiklo da Lella Tomazzini.

Por spektar ulo interesiva che la interreto pri Diwali, onu «click»-ez sube:

http://www.youtube.com/watch?v=OK-5GiGhhKU&feature=related

http://www.youtube.com/watch?v=vMguvWvA5Yk 1908

(Ek Kuriero Internaciona n° 2/2010)

NOVELO

MADELON LA HUNDO

Redaktita dum la 1930ma yari.

«Ne atingebla esas l'aspiro dil homo, ne atingebla, trompanta skopo ol

esas» (Csongor kaj Tünde) [Dramatatra poemo dal Hungara autoro Mihaly

Vörösmarty].

D-ro Phil; Janos Batky, diversamaniere defensis su kontre la grizeso di lua

propra vivo. Dum lua puereso per manjar chokolado, lu kelkafoye sucesis

imaginar da su ke lu manjas sika sociso. Plu tarde ilu tre prizis la mixita

drinkaji. La jino en la vermuto esis simila a la fortesoza fantomo di velkinta

pin-foresti. Aden la reda vino esis posibla varsar «curaçao», ed ol esis

simila a yunino evanta dek-e-sis yari, qua de ta tempo ja certe divenabis

spozino. La vizajon di ca muliero lu konstante obliviis.

– Quale aspektas Jenny ? - il meditis dum ula autunala posdimezo en

London.

184

Palio tektizis la mikra kirko dil Walsana metodisti, opoze a qua lu stacis.

La Londonana kirki konservas admirinde la vilajeso dil vera kredemeso

mem meze dil automobili. Rapide il notis ica aforismo, nam lu esis homo

ordinema. Pose per la penso il retrovenis a Jenny. Kin minuti pos nun esos

sis kloki. Se til sis kloki il ne rimemoros, quale aspektas Jenny, ito esos

katastrofal.

Lo esas ya vera, ke Jenny generale surhavas obskure blua mulierala

kostumo ma ico tamen ne esas definebla kom absoluta vereso. Evidente