Jenny havas ulo specala Jenny-esal ma nur kelkete, tam multe kam
teospeci diferas l'una de l'altra. Tandem omna muliero esas Jenny.
–
Ica questiono esis tre justa. «La unesma tasko e maxim desfacila, che
singla rendevuo esas la konstato dil identeso» - icon notis Batky nur
mente. Hike esas ula damo stranjera, qua dicas stranjaji, ed iraceskas,
nam me vartis elu en altra loko kam olta pri qua ni parolabis. Batky lasis
Jenny ekvarsar sua iraco, pose il questionis :
– Kad vu forsan venus kun me por drinkar teo ?
– Ho, no – respondis Jenny mortale pala, quale sempre, kande prizentesis
ica posibleso.
Pose li iris a la lojeyo di Batky por drinkar teo, quale sempre.
Jenny parolis pri la klienti. Oldulo kompris fairpikilo di George-ala epoko,
ligna madono e mikra statuo di negra arto. Ma quanta tempo ico duris !
Nome il marchandis tenace. Ho, ed esis du yuna viri, certe artisti, ili dicis
a Jenny, ke el esas quale Italiana ucelo. Quale nomesas ita famoza
Italiana piktisto ?
– Giovinezzo Giovinezzi – propozis Batky.
– Yes, e li invitis elu por dinear. Ma el ne iris. Decanta muliero ne iras a
tala invito. Nome Jenny laboris en vendeyo pri artaji.
– E komtino Rothesay esis ibe itere.
– Ho, kad el esis ibe ? lore questionis Batky, kelke vekinte.
Rothesay...belega. Historiala nomo. Ulun de elua ancestri pendigis ja la
unesma Skota Jakob ulaloke en St. Albans. Balde me kontrolos ico heme.
- Quala muliero esas komtino Rothesay ?
– Ho, el esas tre stranja. Yes, esas certe posibla dicar mem, ke vere el
esas tre stranja. El nur envenas la vendeyi, indikas ulo, forsan ni dicez,
kandeliero, ed elu forportas ol...
Batky profundeskis en sua pensi. Heme, dum ke Jenny preparis teo
(Jenny per lua tota amoro icon juis maxim sincere), Batky kontrolis la
historio di le Rothesay. Un de li fakte esabis pendigita. Il imaginis Skota
lago, avan la kastelo esas la tradicionala du chas-hundi, la komto esas
melankolioza, il kolektas ivoraji, e sekrete, sola il drinkas alkoholaji til
ebrieso en ula fenestra nicho. La komtino en elua kordio ja esas katolika,
185
el venigas tra la tapetizita pordo jezuiti, maskita chefa mediki. Sur la cielo
natas nubi havanta tragediala formi.
Pos la teo-drinkado Jenny indiferente vartis, ke elua mulieral destino
realigesez, Batky tacis. «Se nun Jenny esus komtino Rothesay, me dicus
: - Milady, quale vu povis agar ico ? Quale vu povis riskar vua reputeso ?
Ja en la vicina lojeyo Mrs. Bird konstante embuskas su... e cetere...ula
Rothesay, di qua onu pendigis la ancestro inter tante tragediala
cirkonstanci, quale lu povas humileskar koram me, borgezo, simpla
ciencisto ? La spionanti di la komto esas sur nia traco...fugez, siorino, quik
eskapez... – e kande elu ekirus e stacus en la pordo defieme, kun levita
kapo, ilu dicus : Ho, milady, restez ankore centimo de instanto, mem se
pose venos l'inferno...» E lu jetis su an la pedi di Jenny. Jenny kelkete
embarasata karezis ilua hararo, ma el ja kustumeskis ad omno. E pose
omno eventis, tale, quale kustumale.
Jenny itere poslasis ula vestopeco, e kande elu retrovenis, el ja trovis
Batky extreme agacita. Batky meditis pri co, ke il disipas ilua tota vivo por
irga Jenny-i, quankam il ja quik de lua puerevo deziras komtini Rothesay-
atra. La historio esis por lu la mondo erotika, quale por altri la teatrala
restaji, e por vera, granda amoro il bezonis historio, adminime evanta plura
centi de yari. E yen Jenny... esas nura mentiajo ed onanismo.
– Quo mala ? Questionis Jenny.
– Nulo. Nur ne venez altrafoye. Mulieri havanta reda manui restez heme.
E via femuri tenueskez. Ed entote cesez existar.
Dum plura dii il stacachis en ita extreme silencoza stradi, ube segun lua
savo lojas la Angla aristokrati, kande li sejornas en London. Foye en ita
stradi pasis granda kamioni surhavante la nomo di ula famoza Londonana
firmo. «Certe ulaloke esos vesper-festo» - ilu pensis ecitite. Ye ula loki il
sucesis konversar kun familiani di pordisto.
«La maxim grava karakteriziva traito di aristokrati esas la nevidebleso» -
il notis. Pos kelkete reflektir il adjuntis : «Blondini ne prizas fishi, ma eli
extazeskas, se onu propozas ad eli marala aranei.»
Ma vekante sundie il sentis ilua aristokratal soleso deprimanta, ed iris a
Regent-Parko, por ibe kompletigar ilua mulierala kolekto per ula
promenanta komizino. Lua atencon kaptis precipue la skureli, qui en
grandega amaso amuzis la publiko en ica parko ; ultre lo anke la hundi.
Avan ilu promenis extreme interesiva nigra hundo, similesanta Skota
Dop la hundo damo, tranita da la hundo ecitata.
Semblis ke la hundo serchas ulo. Lu timante flaris la tero. Fine lu haltis
avan ula monumento. Kun la joyoza ecito di ti qui atingis lia skopo, lu
