В первом же дни не ведоша его к Соломону. И рече Китоврасъ: «Чему мя не зоветь к себе царь?» Реша ему: «Перепилъ есть вечеръ». Взя же Китоврась камень и положи на камени. И поведаша Соломону творение Китоврасово. И рече царь: «Велит ми пити питие на питье». Во другий же день не зва его к себе царь. И рече: «Чему не ведете мя ко царю и почто не вижю лица его?» И реша: «Немогаеть царь, имже вчера много елъ». Сня же Китоврасъ камень с камени.
В 3 же день реша: «Зовет тя царь». Он же, умеря прутъ четырехъ локотъ, и вниде пред царя, и поклонися, и поверже прутъ пред царемъ молча. Царь же мудростию своею протолкова прутъ боляромъ своимъ и рече: «Область ти далъ есть вселенную, и не насытился еси, изымалъ еси мене». И рече ему Соломонъ: «Не на потребу свою приведох тя, но на вопрос очертаний Святая Святых. Приведох тя по повелению Господню, яко не повелено ми есть тесати камени железом».
И рече Китоврасъ: «Есть ноготь птица[225] малъ во имя Шамиръ. Хранит же кокоть
Бысть же Соломонъ вопрашая Китовраса: «Почто ся еси расмеялъ, мужу прашащу черви на 7 лет?» — «Видехъ на немъ, — рече Китоврасъ, — яко не будеть до 7 дни живъ». Посла же царь испытати, и бысть тако. И рече Соломонъ: «Почто еси расмиялся, мужю ворожащу?» Отвеща Китоврас и рече: «Онъ поведаше людем скровная, а самъ не ведя крова под собою со златом». И рече Соломонъ: «Шедше, испытайте». И испыташа, и бысть тако. И рече царь: «Почто еси плакалъ, видевъ свадбу?» И рече: «Съжалихси, яко жених той не будет живъ до 30 дни». И испыта же царь, и бысть тако. И рече царь: «Почто мужа пиана наведе на путь?» Отвеща Китоврас и рече: «Слышах с небесе, яко веренъ есть муж той, а достоить послужити ему».
Бысть же у Соломона Китоврас до свершения Святая Святых.
Бысть егда нача молвити Соломонъ Китоврасу: «Ныне видех, яко сила ваша яко человеческа, и несть вашия силы болши нашия силы, и якоя и та». И рече ему Китоврас: «Царю, аще хощеши видети силу мою, да соими с мене уже, дай же ми жуковину свою с руки, да видиши силу мою». Соломон же сия с него у́же железное и дасть ему жуковину. Он же пожре, и простре крило свое, и заверже, и удари Соломона, и заверже и́ на конець земля обетованныя. Уведаша же мудреци его и книжници, взыскаша Соломона.
Всегда же обхожааше страх Китоврашь в нощи. Царь же сътвори одръ и повеле стояти 60 отроком силным с мечи около. Потому же молвится в Писаних: «Одръ Соломонь, 60 отрокъ храбрых от израилтянъ и от страны нощны».[227]
Китоврас же, поидя в люди своа, вда Соломону мужа о дву голову. Обыче же ся житиемь у Соломона мужь тъй. Въпраша же его Соломон: «Которых людий еси ты? Человекъ ли еси ты, или бесъ?» Отвеща он человекъ: «Азъ есми человекъ, живущих под землею».[228] И въпраша его царь: «Есть ли у вас солнце и луна?». Он же рече: «От запада вашего к намь въсходить солнце, а от востока вашего заходит. Егда убо у вас день, тогда у нас нощь. А егда у вас нощь, тогда у нас день». И вда ему царь жену. И родистася у него два сына: един о дву голову, а другый о единой главе. И бысть у отца их имениа много. И умре отець имъ. Рече двоголовый брату: «Деливе имение на головы». И рече менший брат: «Два есве. Деливе имение на полы». И идоста на прю къ царю. И рече единоглавый къ царю: «Два есве брата. Деливе имение на полы». Он же двоглавный рече къ царю: «Две главе имамь, два жребиа и хощю взяти». Царь же мудростию своею повеле взяти оцта и рече: «Аще будета две главе си разно телом; да възлею оцта на едину главу: аще не очютит другаа глава, и тако две чясти възмеши на две главе. Аще ли очютить другая глава възлиание оцта, главы сиа единого тела обе. И единъ жребий имаши взяти». Бысть же възлиание оцта на главу едину, другаа вшерше. И рече царь: «Понеже едино тело еси, и единъ жребий възми». И тако расуди а царь Соломон.
