И бысть царица Южьскаа иноплеменница именемь Малкатъшка.[229] Си прииде искушати Соломона гадками. И та бе мудра зело. И принесе ему дары: 20 капий злата,[230] и зелиа многа велми, и древеса негнеющаа. Слышав же Соломон пришедшю царицю, седе на полате стькла белаго на помостех, хотя искушати ю. Она же виде, яко въ воде седить царь, въздья порты своа противу к нему. Он же видевъ, яко красна есть лицемь, тело же ей бысть власато, яко щеть. Власы же онеми она обадаше мужа, бывающаго с нею. Рече же Соломон мудрецемь своимъ: «Створите мовь кражму съ зелиемь, и помажите тело ея на опадение власомь». Хитреци же и книжници молвяхуть, яко съвъкуплятся есть с нею. Заченши же от него и иде в землю свою, и роди сынъ, и се бысть Навходоносоръ.
Се же бысть загадка ея к Соломону. Съвъкупила бяшет отрокы и девкы малыа и облаченыа в порты едины, и рече царица царю: «По мудрости своей разбери, кое отрокы, кое ли девкы». Царь по мудрости своей повеле, и принесоша овощь, и просыпаша пред ними. Отроци же начаша брати в пелены, а девкы в рукавы. И рече Соломон: «Се отроци, а се девкы». Она о семь подивися хитрости его.
На другый же день събравши отрокы обрезаныа и необрезаныа, и рече Соломону: «Разбери, кое обрезаныа, кое ли необрезаныа». Царь же повеле архиерееви внести венець святый, на немже бе написано слово Господне, имже бысть Валамь уничиженъ от волхвованиа.[231] Отрочата же обрезанаа сташа, а необрезанаа припадоша пред венцемь. Она же велми сему удивися.
Мудреци же ея загонуша хитрецемь Соломонемь: «Имамь кладязъ далече града. Мудростию своею угоните, чимь можемь и привести въ град?» Хитреци же Соломони, разумевше речь, яко не может быти, и реша имъ: «Исплетите у́же отрупяно, а мы привлечемь кладязь вашь въ град».
И пакы загонуша мудреци ея: «Аще възрастеть нива ножи, чимь ю пожати можете?» Отвещаша и реша имъ: «Рогомь ослиимь». И рекоша мудреци ея: «Где убо у осла рога?» Они же реша: «А кде нива родится ножи?»
Загонуша же еще: «Аще въгнеется соль, чимь ю можете осолити?» Они же реша: «Ложе мьскы вземше, тем же посолити». И реша: «Да кде мьска родить?» Они же реша: «Где ся соль съгнивает?»
Царица же видевши храмы созданы и брашна многа, и седание отрокъ его, и стоание слугь его, и одение их, и питие, и жрътву, и еже жряше в дому Божии, и рече царица: «Истиннаа речь, юже слышах в земли моей, уне мудрости твоеа. И не имях веры речемь, дондеже приидох видеста очи мои. Оли не сказано ми бысть ни половина. Но болозе мужемь твоимь, слышащим мудрости твоеа».
Царь же Соломон вда царици оной имя Малкатошка и все, еже просила. И иде в землю свою съ отрокы своими.
Въ дни Соломоня бысть мужь, имея 3 сыны. Умираа же, муж онъ призва к собе сыны своа и рече имъ: «Имею кровъ в земли. Томь месте, — река, — 3 спуды стояща другь на друзе горе. А по смерти моей възми стареиший връхнее, а середний середнее, а исподнее — менший». По умртвии же отца их открыша сынове его кровъ онъ пред людми. И бысть верхнее полно злата, а среднее полно костий, а исподнее полно персти. Бысть же бо и сваръ въ братии оной, рекуще: «Ты ли еси сынъ, оже въземши злато, а ве не сына?» И идоша на прю къ Соломону. И расуди а Соломон: иже что златомь — то старейшему, а иже что скотомь и челядью — и то середнему, — по разуму костий; а иже что винограды и нивами и житомь — то меншему. И рече имъ: «Отець вашь был муж мудр, и разделилъ вы зажива».
Се пакы идоша три мужи на путь свой, имуще чересы своа съ златомь. Ставше же суботовати в пустыни, смолвиша поветъ: «Съхранимь златомь на скупе: да аще будуть разбойници, да убежимъ, а оно будеть съхранено». Ископавше же ровъ, въскладоша вси чересы своа на скупь. И бысть в полнощи, яко упоста два друга, единъ же, имея мысль злу, въставь, перехорони чересы на ино место. И яко, отсуботовавше, идоша на место взяти чересы своа, и не обретше, завопиша вси одино; он же, си лукавый, завопи велми боле обою. И възвратишася вси домови. И реша: «Поидемь к Соломону и скажемь пагубу нашю». И приидоша к Соломону и реша: «Не вемы, царю, звер ли взял, птица ли, ангелъ ли. Повежь намъ, царю». Он же рече имъ мудростию своею: «Обрящу вы заутра. Понеже аще путници есте, упрося прошю у вас, повежьте ми:
