Но ты, милостивый Отче, сведый тайнаа сердца моего, молю ти ся, Господи Боже, Спасе мой: ты сам ныне, сам, прости мя и разреши грешнаго и недостойнаго раба своего, священноинока Еуфимиа, ибо сам ся связах лютыми грехы и некому разрешити мене, грешнаго, разве тебе, Господа Бога моего, Исуса Христа. Се бо в беззаконии зачатъ есмь, и в гресех роди мя мати моя,[1097] согреших, Человеколюбче, от родства моего и до сего часа всеми чювствы моими пред тобою, Светодавцем, и пред Пречистою Материю, и предо всеми святыми. Несть бо таковаго грешника на земли сей и несть того греха, егоже азъ, окаанный, не сътворил, а и последнему несть числа; ни в мертвых, ни в живых мене окаанне и грешнее несть; ни в Содоме, ни в Гоморе не бысть такова грешника,[1098] якоже азъ согреших. Съгреших съ безсловесными скоты, всеми составы моими съгреших, оскверная душу мою и тело! И бых началникъ всякому злу: ленив на добраа дела, трезвъ же на сквернаа дела. И несть конца ни краа моим безчисленым грехом, имиже оплакан бых от аггелъ, имиже поношение и смех бых врагом, ихже ради осужен бых различным и безконечным мукам.
Но ты, милостивый Господи-вседръжителю, невидимый Отче, приими ныне грешное мое покаание и помилуй мя, грешнаго священноинока Еуфимиа, ты бо веси, благоутробне, мое окаянство, мое безаконие, мои безчислении греси. Не достоин бо есмь человеколюбиа твоего, Господи, достоин есмь безконечней муце за моя окаяннаа дела и безчисленыа грехи. Но воля твоа да будет — помилуй мя туне!
Государю-человеколюбче, Святаа Троице, Отецъ и Сынъ и Святый Духъ! Не отрини мене, блудника, прелюбодея, содомлянина, скотоблудца, сребролюбца, святокрадца, сластолюбца, крадоядца, крадопийцу, татя, клеветника, ропотника злобнаго, лъживаго зазирателя, осудителя, чревоядцу обястливаго, тщеславнаго празнословца, небрежливаго, лениваго, неисправленаго в молитве церковней и в келейной, заклинателя, запрещеннаго въ опитемъях,[1099] исполненаго всякого злодеаниа и помышлениа, клятвопреступника, во лжу кленущагося, зломысленика в блудных и хулных помышлениих на тебе, Государя-светодавца, и на Пречистую Владычицу Богородицю, и на всех святых твоих. И вся сиа злаа дела моя в небрежении полагах и никакоже о них покаятися въсхотех, но день от дне беззаконие къ безаконию прилагах.
Но, о, Владыко-человеколюбче, во всех сих каю ти ся, помилуй мя и прости мя, неключимаго и непотребнаго раба твоего Ефимиа! О, милостивый Боже, отпусти вся грехы моя, елико ти согреших душею, и телом, и помышлением, словом и делом, ведаа и не ведаа, волею и неволею — вся ми прости преже разлучениа души от тела моего.
Посли ми, Господи, в помощь святаго аггела-хранителя, да мя утешит и наставит на путь истинный, и да сохранит ми душу и тело, да соблюдет мя в дни и в нощи и на всяк час, и до последняго издыханиа моего. Посли ми, Господи, вся святыа твоа избранныа, да ми покажут путь спасеный, по немуже сами ходиша. Осени ми, Господи, душу и тело Духом твоим Пресвятым, тоже мя разлучи от тела моего, и в час разлучениа моего спаси мя, и приими с миром душю мою, и причти ю ко избранному стаду овец твоих, и сподоби мя одесную тебе стати в Страшный День он пред страшным престолом твоим неосуждену молитвами Пречистые твоеа Матере, Владычица нашеа Богородица, Приснодевы Мариа, силою Честнаго и Животворящаго Креста и святых небесных сил безплотных Михаила и Гавриила,[1100] и прочих безплотных сил, и святого пророка и предтечи, крестителя твоего Иоанна,[1101] и святых верховных апостолъ Петра и Павла, и обоюнадесяти, и святого собора 70 апостолъ,[1102] и святых всех святителей: Василиа Великаго, Григориа Богослова, Иоана Златоустаго, и святого великаго чюдотворца Николы,[1103] и святых вселенских 7 соборов, и святых отець 318, иже в Никеи,[1104] и святых преподобных отець наших: Антониа Великаго, Савы Освященаго, великого Еуфимиа, Феодосиа Иерусалимскаго,[1105] и всех преподобных отець, иже в пустынях и в горах, яко светила, просиавших, и иже преже бывших, и ныне, послеже, в Росийской земли просиавших, и Владыце Христу угодивших добродетелми непорочнаго их житиа, и землю нашу Русскую просветивших, иже и по смерти, яко светила, сияют, и нас просвещают, и всех православных озаряют чюдесы, и знамении, и святыми своими молитвами, и богоугодным житием, и труды, и поты, и въздыханием, и слезами; многиа обители и святыа церкви в славу и похвалу Вседержителю Богу создаша, и Пречистей его Матери, и всем святым, иже и телеса нетленна их сохранени быша и до нынешняго дни на уверение непорочнаго их житиа, иже церкви и храмы их нерушими и нетленны пребывают, яко столпи непоколебимии; и ограды их, и монастыри, святаа места их, яко второе солнце, сияют, и всех просвещают, и наслаждаютъ духовне, убо душа спасают, телесне же плоти нашеа неможение питают и утешают.
