Конец же, — сие еще мало въспомяну души своей, — сице: «Въстани, окааннаа душе моа! Въстани, убогаа! Въстани, смиренаа! Въстани! Что спиши? Въстани, побди, дондеже время ти есть! Въстани, окаяннаа, преже смерти малодушие отжени, слабость отложи, исповеждь Господу Богу, яже согрешила еси, отнелиже родися. Вздохни, и прослези, бьюще в перьси, разсточи, яже имаши и можеши, усердно, и даж, душе, обеты ктому не согрешати. Смерть настоит безвременна, якоже тать, и дни не веси, и часа не знаеши, да тя не постигнет неготову, окаяннаа! Прости согрешившему и прогневавшему тя, остави, елика ти согреши, помилуй искреняго! Къ Богородици припади, молящися, яко дръзновение имущи много къ Владыце, глаголюще сице: „О Пресвятаа Госпоже Дево, Владычице Богородице, молися Сыну своему и Богу нашему, да избавит мя вечныа мукы, и буди ми помощница и заступница в нынешнем и в будущем веце”». И всех святых непрестанно моли, яко да ти Христа милостива сотворят.
Тогда, аще приидет смерть, душе, не устрашися. «Смерть бо праведником покой бывает»,[1115] — якоже рече ко июдеом Христос. «Аминь, аминь глаголю вам: веруяй в мя и творяй словеса моя не узритъ смерти, смертию бо къ жизни преидет оной, присносущей, не имущей конца»,[1116] — якоже самаа истина, Христос, реклъ есть. Се, душе моа, рех тебе хотящаа быти и добраа, и злаа; вся воспомянух ти нынешняго века, отчасти и будущаго, такоже о спасении своем попецыся и вины не предлагай.
Исповедаюся Богу, и Пречистей его Матери, и всем святым его, и тебе, господине отче, вся согрешениа моа и вся злаа моя дела, яже помыслих, яже глаголахъ, яже волею моею сотворих или неволею, яже помню и яже не помню.
1. Согреших от чрева матери моея, преступих вся заповеди, писанныа нам в святых книгах, и оскверних святое крещение, и паки иноческий святый образ оскверних и обещаниа иноческаго не сохраних.
2. Согреших в наведении бесовских помыслъ, скверных и нечистых, на Господа Бога моего, и на Пречистую его Матере, и на вся святыа, отнюд не мощно сказати, ни исписати.
3. Согреших небрежением церьковнаго собора и божественаго пениа Святыхъ Писаний; и отца своего духовнаго заповеди не сохраних и преслушах, и свое правило заложих слабостию и леностию.
4. Согреших разжением скверные похоти и различными истицании во сне и наяве, любодеанием в мыслех скверных, и нечистых, и неявленных.
5. Согреших в церкви в мыслех нечистых, и в смеянии до слезъ, и в празнословии, и очима възирах личнаго взора мыслию блудною.
6. Согреших осужением, оклеветанием, оболганиемъотецьдуховных, и всякого священническаго чина, и всей, еже о Христе, братии, и всякого человека.
7. Согреших злопомнениемъ и лъганием всякым, завистию, гневом, яростию, злобою, гордостию, величанием и богомерскыми словесы.
8. Согреших тщеславием, славолюбием, чревобесием, обиядением, пьянством, волхвованием и наузы и всякого бесовскаго неистовства.
9. Согреших роптанием, братаненавидениемъ, запрением чюждаго имениа и всяким крадениемъ монастырьских вещей.
10. Согреших душею моею и телом, слухом и видом, языком и гортанем и всеми чювствы моими, всем созданием.
А всем сим грехом моим не могу представити ни времени, лиц, ни числа, ни места, ни дни, ни часа. А всем сим грехом моимъ опитемьи не исправих. И несть того греха, егоже не сотворих, но о всех каюся Господу Богу моему, сътворшему мя, и тебе, господине отче. И ты, господине отче, Господа ради, прости мя, и благослови, и помолися о мне, грешнем, и разреши всяко слово, и отлучение, и клятву, и проклятие, и всяк союзъ греховный.
Вы же вси, о, отцы и братие мои о Христе Исусе и духовнаа чада, по духу или будут сродницы по плоти, елицы прочтете грубыа моя стихы, плачитеся, плачитеся, ей, съ мною рыдайте! Се бо знамение есть совершенныа любви, еже радоватися с радующимися и плакати съ плачющими.[1117] В воздыхании горком и в слезах многых молю всех вас и ног ваших касаюся: о мне, грешнем и смиренем, помолитеся, Христовы ради любве, и глаголите сице: «Прости, Господи, прости и помилуй, Христе Боже, душу грешнаго инока Ефимиа, исплетша гране сие», яко да не попалит мя когда огнь геонский, понеже Создателя моего прогневах беззаконьми моими и безмерными делы, студными и скверными.
