Не по мнозе же времени присташа людие къ острову, с ними же бе инок именем Феодосие. Сей прииде къ преподобному Зосиме, хотяше съжительствовати с ним на острове, бяше бо имый священничества чин. Святый же съ усердием приат ѝ, с радостию великою прослави Бога, яко сподоби его съжительствавати съ братиею вкупе. И повелениемъ преподобнаго сей постризает во иноческый образ предреченнаго Марка и нарицает имя ему Макариа. И по семь мнози прихожаху иноци к нему на остров, хотящеи съжительствовати с ним о Бозе. Святый же радостною душею приимаше их и глаголаше: «Владыко Господи, призри с небесе и виждь и посети место сие, еже сътвори десница Твоя».
И начаста древеса сещи и келиа здати. По сих же и церквицу малу въздвиже, и трапезку малу по стране церкви присъвокупи, — на том месте, идеже лучю светавиде неизреченнаго и церковь на воздусе. Церковьже именова во имя Господа нашего Исуса Христа святое Преображение.
Таже съвещавает сь братиею и посылает старца в Великий Новград къ пресвященному архиепископу Ионе;[134] да въсприимут от него благословение и просят святости церковныа на освящение храма антимиса,[135] да и игумена просити свящати церковь и имети попечение о братии. Брат же некый наредяся скоро по благословению святаго и пути касается; и благостройно ему бяше путное шествие по морю и по рекам и по езером, молитвами преподобнаго Зосимы. Въскоре приходит вь пресловущий Новград.
И прииде къ архиепископу, просяше благословениа. Архиерей же старца благослови и въпрашает ѝ: «Откуду, о иноче, и чьсо ради твое к нам пришествие?» Чернець же отвеща и рече: «Владыко святый, съвершися божественый храм внове в морском острове окыяна в твоей державе. И аще повелит твое святительство, дай нам благословение свое на освящение храму Господа нашего Исуса Христа боголепнаго Преображениа антимис. Якоже годе бысть твоему святительству, дай нам и игумена съ благословениемъ». Архиепископъ же глаголя: «Где, брате — селико вдалее от людей? Да кто может жити тамо?» Бе бо приближилися чюжеверных земли — Мурманская и Каянская.[136] «И како церкви быти тамо?» И по сем мало размысливь в себе, рече: «Невозможная от человекъ, вся бо возможна суть от Бога;[137] аще Богъ въсхощет, вся сиа будут. Наша убо начати, Божие же съвершити. Буди имя Господне благословено въ векы».
И старца посолника благослови, и учредивъ ѝ, повеле дати на освящение церкви антимис. И избрав старца некоего именем Павла, чином священничества подобне украшена, и дасть им игумена. И сего наказав благодухновенными словесы, како пасти Христово стадо словесных овец и имети прилежно попечение о душах их. И тако повелев дати им потребнаа на путь и отпусти с миром. Они же, приимше от старца благословение, скоро пути касахуся, и не по мнозе времени, деньми яко четыредесяти, достизают острова Соловецскаго, молитвами преподобнаго.
Таже начаша поведати блаженному Зосиме святительское благословение. Он же радостною душею прослави Бога, яко получи желание сердца своего. Павел же игумен освяти церковь священиемь во имя святаго Преображениа Господа нашего Исуса Христа — преподобный же велми возрадовася духом о величии Божии! И тако съ игуменом и братиею пениа и молитвы беспрестани възсылаху Богови и Пречистей Его Матери. И тружахуся постом и молением, купно же и ручным деломъ: овогда землю копаху, иногда же древеса на устрой манастырю сготовляху; иногда дров множество секуще готовляху, и росол морскый черплюще, и тако соль варяху — и даяху купцем, приходящим къ острову, и от них взимаху всяко орудие на потребу манастырскую, и в прочих делехъ тружахуся. Такоже и рыбную ловитву творяху в мори и по езером, беша бо на острове езера многы, числом яко 70 или множае.[138] Благоугодно бо бе место то къ устрою манастырьскому! И тако от своихъ трудовъ и потовъ питаахуся. Бе бо их число братии съ игуменом и съ блаженым Зосимою 20 и два; и бе всем подвиг о обители, яко едина душа в разных телесех тщание.
Видевше же беси себе поругаемы и уничижаеми от преподобнаго и от братии, иже с ним подвизающихся, и мног мятеж и смущениа приношаху всякими козньми, и лаянии, и призракы, и мятежными виды своих прелестий, и ничимже възмогоша вредити блаженнаго. Но паче инеми злыми ухищренми възустиша на нь некыя неразумныя человекы на погыбель душамъ их. Начаша людие многы пакости творити святому: преходящии морем населници — болярьстии людие и приказници раби — рыбную ловитву творяху на острове по езером, много оскорбляху преподобнаго. И зле належаще, не даваху рыбы ловити братии и злыми словесы наречие дающе ему, глаголюще сице: «Почто ты, калугере, зде вселяешися? Се есть по отечеству наследие наших болярь!» Такоже и корельстии людие преходяще, ловитву творяху на море округъ острова и по езером на острове, рекоша: «Се есть наша отчина, корельскыя земля» — и пакости многы творяще.
