Весь чинъ положи по Типику иерусалимскому[168] въ своем монастыри. И учаше братию хранити вся заповеди, преданныя по Божественем Писании святыих апостол и святыих отець седмии Соборов,[169] непреложно блюсти инночьскаго жития правила, уставъ хранити неизьменно, иже предасть великый Антоние, и Еуфимие, и Сава, и Феодосие, и Пафомие,[170] и прочий преподобнии отци, симь последоваша. Тако и сей преподобный учаше и въ всяком деле образ собою показаваша вышних искати.[171] Братия же, яко благоплодная земля, приемлюще съмена, и во всем повиновахуся, послушание творяще, зряще чюднаго его пребывания, терпения и смирениа нелицемернаго, постъ и молитвы беспрестани съ умилением. И тако пребывающе с ним, в дьлех ручных тружахуся, и от своихъ трудовъ и потовъ пищу приимаху, даже и доднесь, благодатию Христовою и Причистыя Его Матере, и во всяцем устроении без мятежа. Мы же на предняя възвратимся.
По неколицех летехъ своего пастырьства преподобный Зосима въспомянувь о блаженем Саватии, яко преже подъятъ подвизи, труды, постъ и терпение и многыя добродетели, а ныне мощи его на месте пусте суть положени. И съветъ положи с братиею, глаголаше: «О братие, како прельстихомся от неразумия о сицевой вещи!» Сия ему глаголющу, приидоша братия, посланнии на службу к Новугороду, и принесоша послание с Бела-езера, писано изъ обители Пречистые Богородица Кирилова манастыря, послано от игумена братии, глаголюще сице:
«Възлюбленному о Христе благодать и милость от Бога Отца Господа нашего Исуса Христа![172] Духовному настоятелю боголюбивому игумену Зосиме и со всею еже о Христе братиею — радоватися.
Слышахом бо некогда от приходящих страны вашиа до нас о острове том Соловецком, яко не приближно бе человеком первие за морскую скорбь и нужду во еже тамо пребывания от древних лет, отнелиже солнце вь небеси. Ныне же слышим от многых самовидець, яко той остров Божиим изволением и Пречистыя Богородица ходатайством и вашего по Бозе трудолюбия тщанием състависте обитель и братства множество събрася, и монастырь създан бысть честенъ, и храми въздвигошася велелепнаго Преображения Господа Бога и Спаса нашего Исуса Христа и его Пречистыя Матери честнаго ея Успения, и вся добре исправисте добродетели, памяти достойна. Но единого дара лиховани бысте, — иже прежде вашего трудолюбиа о Бозе жительствующаго и скончавшаго житие в молитвах, и трудех, и в пощениих, и въ исправлении добродетелнем съвершена. Якоже древнии бяху преподобнии отци, тако и той блаженный Саватие удалився мира и всею душею Христа възлюбивъ и в совершении блаженую кончину приятъ, радуяся. Слышаху бо неции братия от манастыря нашего, бывшеи в Велицем Новегороде, сицеву повесть от некоего христолюбца мужа именем Иванна. Сей поведая рече: „Идущу ми к морю из рекы Выгъ, и обретох старца отшелника имянем Саватия, жительствовавшаго на Соловецком острове. И сподоби мя Богъ погрести святыя мощи его съ игуменом Нафаналом близъ Выгу-рекы у часовни. И молитвами его чюдодействоваше Богъ преславная чюдеса”. Такоже и о брате своем Феодоре изрече, яко поклонися токмо гробу преподобнаго и от каковы злыя смерти съхранен бысть на мори молитвами блаженнаго Саватиа! И ина многа чюдеса и знамениа, яже творяхуся у гроба его святаго.
Сего ради пишем вашему преподобию о сем, яже слышахом. А и сами есмы сведетели добродетелному его житию, понеже бо сей блаженый Саватие житие имеаше в дому Пречистыя Богородица Кирилова манастыря, якоже преди речеся.
Ныне же вашей святости даем съвет духовный: да не лиховани будете таковаго дара, егоже сподоблени бысте от Бога, но скоро с потщаниемь шедше, пренесете блаженнаго мощи въ свой манастырь, да идеже лета многа телом потрудився, тамо и святыя мощи его да будут положени.
Здравьствуйте о Христе Исусе в вечную жизнь, и нас вь молитвах ваших поминайте, яко боголюбиви, да некли и нам подасть Господь Богъ свободу от всех зол, находящих на ны, молитвами своего угодника, преподобнаго Саватиа».
Блаженый же игумен Зосима прочет написаная к ним посланиа Кирилова манастыря и възрадовася душею, тако же и братство все о Господе, въздаша благодарение Богови. И реша вси, яко единеми усты: «Несть се от человекъ послание, но от самого Бога, прославляющаго святыя своя!»
